اسلام آباد: پلاننگ کمیشن نے اڑان پاکستان کے تحت 5 سالہ اہم اہداف مقرر کردیے، 2029 تک فی کس آمدنی کو 2405 ڈالرتک لے جانا ہے۔
تفصیلات کے مطابق پلاننگ کمیشن نے اڑان پاکستان کے تحت 2029 تک جی ڈی پی کی شرح 6 فیصد تک لے جانے کا ہدف مقرر کیا ہے، دستاویز میں بتایا گیا ہے آئندہ پانچ سالوں تک فی کس آمدنی 2405 ڈالرتک لے جانے کا ہدف ہے، 2029 تک کرنٹ اکاؤنٹ جی ڈی پی کا 1.2 فیصد سرپلس کا ہدف مقرر کیا گیا ہے۔
دستاویز میں بتایا گیا ہے کہ 2029 تک آئی ٹی برآمدات 10 ارب ڈالرز تک بڑھانے کا ہدف ہے جبکہ آئندہ پانچ سالوں تک سرمایہ کاری جی ڈی پی کے 17 فیصد تک لے جانے کا ہدف ہے۔
2029 تک برآمدات 63 ارب ڈالرز تک بڑھانے کا ہدف مقرر کیا گیا ہے، اسی عرصے تک ترسیلات زر 39.8 ارب ڈالرز تک لے جانے کا ہدف دیا گیا ہے۔
دستاویز کے مطابق 2029 تک ٹیکس ٹو جی ڈی پی تناسب 13.5 فیصد تک لےجانے کا ہدف ہے جبکہ سرکاری قرضوں کو جی ڈی پی کے 60 فیصد تک رکھنے کا ہدف مقرر کیا گیا ہے، 2029 تک تعلیم پر جی ڈی پی کا 4 فیصد خرچ کرنے کا ہدف رکھا گیا ہے۔
آئی ٹی برآمدات 10 ارب ڈالرز تک لے جانے کا ہدف ہے، پانی ذخیرہ کرنے کی صلاحیت 23.54 مکعب ملین فٹ تک بڑھانے کا ہدف مقرر کیا گیا ہے، پانی استعمال کرنے کی صلاحیت 40 فیصد سے بڑھا کر 70 فیصد تک کرنے کا ہدف مقرر کیا گیا ہے۔
2029 تک الیکٹرک وہیکل کو 25 فیصد تک بڑھایا جائے گا، 2029 تک غربت کی شرح 21.4 فیصد سے کم کر کے 12 فیصد تک کا ہدف رکھا گیا ہے۔
دستاویز میں بتایا گیا ہے کہ 2029 تک 100 فیصد آبادی کو پینے کیلئے بہتر پانی فراہم کرنیکا ہدف ہے، پرائمری اسکولز میں انرولمنٹ کو 64 سے بڑھا کر 72 فیصد تک کرنے کا ہدف ہے جبکہ 2029 تک ٹوائلٹ کی سہولت کو 68 فیصد سے بڑھا کر 80 فیصد تک کرنے کا ہدف مقرر کیا گیا ہے۔
