فرانس میں اب اردو زبان سکھائی جائے گی

پیرس: فرانس میں اردو زبان سیکھنے کی کلاسز متعارف کروا دی گئیں، یہ کلاسز فرانس کے مقامی، پاکستانی نژاد شہریوں اور غیر ملکی زبانیں سیکھنے کے شوقین افراد کے لیے متعارف کروائی گئی ہیں۔

فرانس میں پاکستانی سفارت خانے نے فرانس کی ایک غیر سرکاری تنظیم کے ساتھ مل کر اس کام کا آغاز کیا ہے، منصوبے کا عنوان ’انسانی ترقی کے لیے ہمنوا‘ رکھا گیا ہے۔

سفارت خانے کے مطابق فرانس میں بسنے والی پاکستانی کمیونٹی ایک عرصے سے اس اقدام کا مطالبہ کر رہی تھی اور اب ان کی ضرورت دیکھتے ہوئے یہ کلاسز متعارف کروا دی گئی ہیں۔

خیال رہے کہ اردو زبان کی کلاسز دینے والا فرانس پہلا ملک نہیں، امریکا، برطانیہ، اور روس سمیت دنیا بھر کے کئی ممالک میں اردو زبان سکھانے کے ادارے موجود ہیں جن میں نہ صرف پاکستان نژاد بلکہ مقامی افراد و سیاح بھی شوق سے داخلہ لیتے ہیں۔

Comments