غالب کی طرح اکبر الہ آبادی کو بھی پھلوں میں آم بہت پسند تھے۔ مرزا غالب کا آم نہ کھانے والوں پر طنز اور اس سے متعلق قصّہ تو آپ نے بھی سنا ہوگا اکبر نے بھی اپنے بے تکلف دوست منشی نثار حسین سے آم منگوانے کے لیے ایک نظم اپنے خط میں لکھی تھی۔
اکبر الہ آبادی نے شاعری میں اپنا الگ انداز اور رنگ پیدا کیا۔ ان کی وجہِ شہرت ان کے ظرافت آمیز اور طنزیہ اشعار ہیں۔ وہ مشرقیت کے دلدادہ تھے اور ایسے شاعر اور واعظ تھے جنھوں نے مغربی تہذیب اور ثقافت کو اپنانے والوں پر اپنے کلام میں خوب چوٹ کی۔ منشی نثار حسین کو ارسال کردہ نظم ملاحظہ کیجیے۔
آم نامہ
نامہ نہ کوئی یار کا پیغام بھیجیے
اس فصل میں جو بھیجیے بس آم بھیجیے
ایسا ضرور ہو کہ انہیں رکھ کے کھا سکوں
پختہ اگرچہ بیس تو دس خام بھیجیے
معلوم ہی ہے آپ کو بندے کا ایڈریس
سیدھے الہ آباد مرے نام بھیجیے
ایسا نہ ہو کہ آپ یہ لکھیں جواب میں
تعمیل ہوگی، پہلے مگر دام بھیجیے
