تسلیم فاضلی پاکستان کے ممتاز فلمی نغمہ نگار تھے جن کے کئی فلمی گیت اور غزلیں مشہور ہیں۔
تسلیم فاضلی نے لاتعداد فلموں کے لیے گیت لکھے اور کئی فلمیں ایسی بھی ہیں جن کے نغمات پاکستان ہی نہیں، سرحد پار بھی مقبول ہوئے۔ یہاں ہم ان کی ایک غزل پیش کررہے ہیں۔ تسلیم فاضلی کا یہ کلام مہدی حسن خاں کی آواز میں بہت پسند کیا گیا اور آج بھی اسی ذوق و شوق سے سنا جاتا ہے۔
رفتہ رفتہ وہ میری ہستی کا ساماں ہو گئے
پہلے جاں، پھر جانِ جاں، پھر جانِ جاناں ہو گئے
دن بدن بڑھتی گئیں اس حسن کی رعنائیاں
پہلے گُل، پھر گلبدن، پھر گُل بداماں ہو گئے
آپ تو نزدیک سے نزدیک تر آتے گئے
پہلے دل، پھر دل رُبا، پھر دل کے مہماں ہو گئے
پیار جب حد سے بڑھا سارے تکلّف مٹ گئے
آپ سے پھر تم ہوئے، پھر تو کا عنواں ہو گئے
تسلیم فاضلی کو ان کے فلمی نغمات پر نگار ایوارڈز بھی ملے۔ وہ 17 جون، 1982ء کو وفات پا گئے تھے۔
