بیجنگ: تجارتی جنگ کے خاتمے سے متعلق مذاکرات کے لیے امریکی تجارتی وفد چین پہنچ گیا، جہاں چینی وفد سے اہم ملاقاتیں ہوںگی۔
تفصیلات کے مطابق چین اور امریکا کے درمیان تجارتی جنگ جاری ہے، جس کے خاتمے کے لیے فریقین کے درمیان مذاکرات کا دور بھی جاری ہے۔
غیر ملکی خبر رساں ادارے کا کہنا ہے کہ چینی دارالحکومت بیجنگ پہنچنے والے امریکی وفد میں رابرٹ لائٹ ہائزر اور وزیر خزانہ اسٹیون منوچن بھی شریک ہیں۔
چین اور امریکا کے درمیان تنازعے حل کرنے کے لیے فریقین کے درمیان کئی نشستیں لگیں گی، امریکی وفد گذشتہ روز چین پہنچا ہے جبکہ بات چیت کا باقاعدہ آغاز آج سے ہوگا۔
غیر ملکی میڈیا کا کہنا ہے کہ چین اور امریکا بغیر وقت ضائع کیے پیچیدہ معاملات کا حل تلاش کرنے کی کوشش میں ہیں، اور جلد سے جلد نتیجہ چاہتے ہیں۔
امریکی صدر ڈونلڈ ٹرمپ نے گزشتہ دنوں اسی مذاکرات کے حوالے سے اطمینان ظاہر کرتے ہوئے کہا تھا کہ دونوں ملک ایک سمجھوتے کے قریب پہنچ چکے ہیں۔
تجارتی جنگ، امریکی صدر نے چین کے ساتھ جلد معاہدہ طے پانے کی نوید سنا دی
یاد رہے کہ گذشتہ ہفتے بھی امریکی صدر ڈونلڈ ٹرمپ نے امکان ظاہر کیا تھا کہ مذاکرات میں پیش رفت ہورہی ہے اور جلد معاہدہ طے پاجائے گا۔
انہوں نے یہ بھی کہا تھا کہ دونوں ممالک کے درمیان مذاکرات کا سلسلہ احسن انداز میں جاری ہے، ممکن ہے دوطرفہ مفاد کو مدنظر رکھتے ہوئے جلد ایک معاہدہ ہوجائے۔
