امریکی صدر ڈونلڈ ٹرمپ کی جانب سے غیرملکی طلبہ پر نئی ویزا پابندیوں سے خود امریکی تعلیمی ادارے متاثر ہو نے لگے۔

خبر ایجنسی کے مطابق غیرملکی طلبا پر پابندیوں کے باعث امریکی تعلیمی ادارے بحران کا شکار ہو رہے ہیں۔ امریکا میں11 لاکھ غیرملکی طلبہ ہیں جس سے معیشت کو 43.8 ارب ڈالر کا فائدہ ہوتا ہے اور انہی طلبہ کی بدولت امریکا میں 3لاکھ78ہزار سے زائد ملازمتیں پیدا ہوئیں۔

امریکا کی جانب سے ٹریول بین اور ویزا اسکریننگ کے باعث غیرملکی طلبہ میں خوف کی فضا ہے۔ غیرملکی طالبہ کا کہنا ہے کہ سوشل میڈیا پر طلبہ کی سرگرمیوں کی نگرانی نے سب کو خوفزدہ کر دیا ہے، ٹرمپ پالیسیوں کےباعث امریکی ساکھ کو نقصان پہنچ رہا ہے جب کہ دیگر ممالک متبادل بننے لگے۔

امریکی ویزا پابندیاں، پاکستانی طلبا کس طرح اس سے بچ سکتے ہیں؟ ویڈیو

پاکستانی طالبہ نور کا کہنا ہے کہ یورپ چھوڑ کر امریکا کا انتخاب کیا لیکن خوف اب بھی باقی ہے۔

امریکی میڈیا کا کہنا ہے کہ ڈاکٹر بدرسوری کی گرفتاری نے امریکی یونیورسٹی کیمپسز پر نئی بحث چھیڑدی ہے اور غیرملکی طلبہ کی کمی سےتعلیمی اداروں کو معاشی بحران کا سامنا ہو گا۔

امریکی صدر ڈونلڈ ٹرمپ نے ہارورڈیونیورسٹی کی غیرملکی طلبہ کو داخلہ دینے کی اجازت معطل کردی۔

ہارورڈ یونیورسٹی کی اسٹوڈنٹ اور وزیٹر ایکسچینج پروگرام سرٹیفیکیشن ختم ہوگئی ہے، جس کے تحت ہارورڈ یونیورسٹی غیر ملکی طلبا کو داخلہ نہیں دے سکتی۔

یونیورسٹی کو زیر تعلیم غیرملکی طلبہ دوسری یونیورسٹیوں میں ٹرانسفر کرنا ہوگا یا اپنے ملک واپس جانا ہوگا۔

امریکی اخبار کے مطابق سیکریٹری ہوم لینڈ سیکیورٹی کرسٹی نوم نے یونیورسٹی کو خط میں ٹرمپ انتظامیہ کے اقدام سے آگاہ کردیا ہے، حکومت کی جانب سے یہ اقدام ہوم لینڈ سیکیورٹی کی یونیورسٹی میں جاری تفتیش کے لیے کیا جارہا ہے۔

امریکی وزیرخارجہ مارکو روبیو نے چینی طلبا کے ویزے منسوخ کرنے کا اعلان کرتے ہوئے کہا ہے کہ چین کے طلبہ کے ویزے منسوخ کیےجائیں گے جب کہ چین اور ہانگ کانگ سے آنے والی تمام ویزا درخواستوں کی سخت جانچ ہوگی۔

غیرملکی خبر ایجنسی کے مطابق ویزے منسوخی کا ہدف خاص طور پر وہ طلبہ ہیں جن کا کمیونسٹ پارٹی سے تعلق ہے۔ ٹرمپ انتظامیہ کا غیرملکی طلبہ کیخلاف کریک ڈاؤن بھی جاری ہے۔