واشنگٹن : رشوت لینے کے الزام پر امریکی بحریہ کے ریٹائرڈ ایڈمرل سمیت نو حاضرسروس اور ریٹائرڈ افسروں پر فرد جرم عائد کردی گئی۔
امریکی بحریہ کو اسکینڈل کے طوفان کا سامنا ہے، نو ریٹائرڈ اور حاضر سروس افسران کو رشوت اور مراعات لینے پر لینے کے دینے پڑگئے، امریکی میڈیا کے مطابق امریکی بحریہ کے ریٹائرڈ ایڈمرل سمیت نو افسروں پر رشوت لینے کے الزام میں فرد جرم عائد کردی گئی۔
امریکی بحریہ کے افسروں پر ایک غیر ملکی کونٹریکٹر کی جانب سے پرتعیش سفری سہولتیں اور دیگرمراعات قبول کرنے کا الزام ہے جبکہ بدلے میں امریکی بحریہ کے افسروں نے کونٹریکٹر کو بحریہ کی خفیہ اور اندرونی معلومات فراہم کیں۔
امریکی بحریہ کے اعلیٰ افسر کو قید کی سزا اور جرمانہ
گزشتہ سال امریکی بحریہ کے ایک اعلیٰ افسر کو کرپشن کا جرم ثابت ہونے پر ساڑھے 6 برس قید اور بھاری جرمانہ عائد کیا گیا تھا ، امریکی بحریہ کے کمانڈراور سیونتھ فلیٹ بحری بیڑے کے اعلیٰ اہلکار مائیکل وینیک پر الزام تھا کہ انہوں نے لاکھوں ڈالرز رشوت کے عوض امریکی بحریہ کی خفیہ معلومات ایک ملائشین ڈیفینس کنٹریکٹرکو فراہم کیں تھیں۔
واضح رہے کہ امریکی بحریہ میں بدعنوانی کی تحقیقات دو ہزار تیرہ میں شروع ہوئی تھیں اوراب تک پچیس حاضرسروس اور ریٹائرڈافسروں پر رشوت لینے پر فردجرم عائد کی جا چکی ہے۔
