واشنگٹن : امریکہ نے پاکستان اور بھارت کے درمیان تنازعات کے حل کے لیے ثالثی کی پیشکش کرتے ہوئے کہا کہ پاکستان اور بھارت امریکی کردار پر اتفاق کرتے ہیں تو اس کیلئے تیار ہیں۔
تفصیلات کے مطابق امریکی محکمہ خارجہ کے ترجمان نیڈ پرائس سے پریس بریفنگ کے دوران صحافی نے سوال کیا امریکا پاکستان اور بھارت کے درمیان ثالث کیوں نہیں بنتا؟
جس پر نیڈ پرائس نے کہا کہ ثالثی کا فیصلہ پاکستان اور بھارت نے کرنا ہے ، پاکستان،بھارت امریکی کردار پر اتفاق کرتے ہیں تواس کیلئے تیار ہیں۔
ترجمان امریکی محکمہ خارجہ کا کہنا تھا کہ دونو ں ممالک کی رضامندی سے یہ عمل ذمہ داری سے کر سکتے ہیں، یہ امریکا کےبس کی بات نہیں کہ پاک بھارت بات چیت کاطریقہ کار طے کرے۔
انھوں نے کہا کہ پاکستان اور بھارت کو تنازعات کے حل کیلئے فیصلے خود کرنے ہیں تاہم ہم پاکستان بھارت میں تعمیری بات چیت کی حمایت کرتے ہیں اور پاکستان بھارت میں بامعنی مذاکرات کی حمایت کیلئے تیار ہے۔
نیڈ پرائس نے پاک بھارت تنازعات کے حل کیلئے سفارتکاری کی ضرورت پر زور دیتے ہوئے کہا کہ تنازعات کے حل کیلئے سفارت کاری اور تعمیری بات چیت کی حمایت کرتے ہیں۔
