The news is by your side.

Advertisement

امریکا جانے کے خواہشمند پاکستانی طلبا کے لیے بڑی خبر آگئی

اسلام آباد : امریکی سفارت خانے نے طالبعلوں کے لیے یکم اکتوبر سے ویزے جاری کرنے کا اعلان کر دیا اور کہا نان امیگریشن و دیگر ویزا سروسز بھی جلد بحال کردی جائیں گی۔

تفصیلات کے مطابق امریکا جانے کے خواہشمند طلبا کے لیے خوشخبری آگئی ، امریکی سفارت خانے نے طالبعلوں کے لیے ویزے جاری کرنے کا اعلان کرتے ہوئے کہا یکم اکتوبر سے اسلام آباد اور کراچی قونصلیٹ سے ویزوں کا اجرا شروع کیا جائے گا۔

امریکی سفارت خانے کی جانب سے اعلامیہ میں کہا گیا ہے کہ ہمیں پاکستان اور امریکہ کے مابین طلبا کے تبادلے کی طویل روایت پر فخر ہے، تقریبا 8 ہزار پاکستانی طلباء امریکا بھر کی یونیورسٹیوں اور کالجوں میں زیر تعلیم ہیں ، طلبا کیلئے ویزے کا اجرا امریکا میں متعین امریکی سفارتی مشن کی اولین ترجیح ہے لہذا امریکہ میں حصول تعلیم کے خواہشمند مزید طالبعلموں کا خیر مقدم کیا جائے گا۔

اعلامیے میں مزید کہا گیا ہے کہ “ہم طلبا ویزا درخواست دہندگان کی بروقت اور محفوظ طریقے سے مدد کے لئے ہر ممکن کوشش کریں گے، ہم نے گذشتہ چند مہینوں میں کوویڈ 19 کے وبائی امراض کے دوران درخواست دہندگان اور اپنے ملازمین کی صحت اور حفاظت کو یقینی بنانے کے لئے اقدامات کیے ہیں۔” .

امریکی سفارت خانے نے ویزے کیلئے آنے والے طلبا کو ماسک پہننے اور سماجی فاصلہ برقرار رکھنے کے حفاظتی اصولوں کی مکمل پاسداری کی ہدایت کرتے ہوئے کہا نان امیگریشن و دیگر ویزا سروسز بھی جلد شروع کردی جائے گی۔

خیال رہے کہ امریکی سفارتخانے نے عالمی وبا کورونا وائرس کے باعث مارچ 2020 میں تمام ویزا سروسز معطل کردی تھیں۔

Comments

یہ بھی پڑھیں