ٹوکیو : جاپانی حکومت نے بھنگ کے طبی استعمال کے تجربات اور تحقیق کیلئے کام شروع کردیا، اس حوالے ماہرین اپنی حتمی رپورٹ آئندہ ماہ پیش کریں گے۔
تفصیلات کے مطابق جاپان کی وزارت صحت بھنگ کے پہلے طبی تجربات کے آغاز کے طریقہ کار پر غور کر رہی ہے۔ اِس وقت جاپان میں قانون کے تحت بھنگ کے طبی استعمال پر بھی پابندی ہے۔
اطلاعات کے مطابق بات چیت کا آغاز گزشتہ روز بھنگ کے طبی استعمال کے ماہرین کے وزارتی پینل کے اجلاس میں ہوا۔
وزارت کے مطابق تحقیقی ٹیم نے مریضوں پر تجربات کے مخصوص طریقوں پر تبادلہ خیال کیا، ٹیم کا منصوبہ مئی کے اختتام تک رپورٹ کی تشکیل کا ہے۔
بھنگ سے تیار کردہ طبی مصنوعات امریکہ اور کئی دیگر ممالک میں منظور شدہ ہیں، ان میں ناقابل کنٹرول مرگی کے علاج کی دوائیں شامل ہیں۔
