سری نگر: حریت رہنما میر واعظ عمر فاروق نے کہا ہے کہ مقبوضہ کشمیر میں ظالم بھارتی فورسز کی جانب سے رمضان میں بھی پیلٹ گن کا استعمال بلا روک ٹوک جاری ہے۔
تفصیلات کے مطابق میر واعظ عمر فاروق نے کہا ہے کہ بھارتی فوج جنوبی کشمیر میں لوگوں پر مسلسل پیلٹ گنز کا استعمال کر رہی ہے جو درد ناک زخموں اور حتیٰ کہ اموات کا بھی باعث ہے۔
حریت پسند کشمیری رہنما کا کہنا تھا کہ مقبوضہ کشمیر میں پیلٹ گن کے استعمال اور انسانی حقوق کی خلاف ورزی جاری ہے، جس کی وجہ سے وادی کی صورت حال میں مزید بگاڑ پیدا ہو رہا ہے۔
انھوں نے کہا کہ جو لوگ مسئلہ کشمیر کو حل کرنے کے خواہش مند ہیں انھیں جاننا ہوگا کہ اسے صرف سیاسی طور پر ہی حل کیا جاسکتا ہے، طاقت کے ذریعے نہیں۔
یہ بھی پڑھیں: مقبوضہ کشمیر میں بھارت کی ریاستی دہشت گردی، 2 کشمیری نوجوان شہید
دریں اثنا، آج بھارتی فورسز نے کلگام ضلع میں ایک اور کشمیری کو شہید کر دیا ہے، فورسز نے تازی پورہ میں محاصرہ کر کے سرچ آپریشن میں نوجوان کو شہید کیا۔
ضلع کلگام میں بھارتی فورسز کے مظالم اور شہادتوں کے خلاف کشمیریوں کے پر امن احتجاج پر بھی فورسز نے وحشیانہ تشدد کیا، جس کے نتیجے میں 50 کشمیری شدید زخمی ہو گئے ہیں، جن میں سے چند کی حالت نازک بتائی جا رہی ہے۔
