اسلام آباد: وزیر اعلیٰ پنجاب عثمان بزدار نے وزیر خارجہ شاہ محمود قریشی سے ملاقات کے دوران کہا کہ ماضی میں جنوبی پنجاب کے لوگوں کو سیاسی وعدوں سے بہلایا گیا۔
تفصیلات کے مطابق وزیر اعلیٰ پنجاب عثمان بزدار سے وزیر خارجہ شاہ محمود قریشی کی ملاقات ہوئی، ملاقات میں باہمی دلچسپی کے امور اور سیاسی صورتحال سے متعلق تبادلہ خیال کیا گیا۔
وزیر اعلیٰ پنجاب عثمان بزدار کا کہنا تھا کہ ماضی میں جنوبی پنجاب کے لوگوں کو سیاسی وعدوں سے بہلایا گیا، سابق حکمرانوں نے جنوبی پنجاب کے فنڈ اپنے حلقوں پر لگائے۔ جنوبی پنجاب کے عوام نے دھوکا دینے والوں کو مسترد کیا۔
وزیراعلی پنجاب سردار عثمان بزدار سے وزیر خارجہ شاہ محمود قریشی کی ملاقات:
جنوبی پنجاب سیکرٹریٹ کے قیام پر تبادلہ خیال۔
“جنوبی پنجاب کا ہر ضلع، ہر شہر اور ہر گاؤں ترقی کے عمل میں شریک ہوگا”۔وزیر اعلیٰ pic.twitter.com/dAHCLx2MuX— Government of Punjab (@GOPunjabPK) March 7, 2020
انہوں نے کہا کہ تحریک انصاف کو جنوبی پنجاب میں شاندار مینڈیٹ ملا، ہم اس مینڈیٹ کی لاج رکھیں گے۔ حکومت جنوبی پنجاب کے عوام سے کیے وعدے ہر صورت نبھائے گی۔
وزیر اعلیٰ پنجاب کا کہنا تھا کہ جنوبی پنجاب کے عوام کو ان کا حق لوٹائیں گے، ترقیاتی فنڈز کی غیر منصفانہ تقسیم باب بند کر دیا ہے۔
ملاقات کے دوران جنوبی پنجاب سیکریٹریٹ کے قیام پر تبادلہ خیال ہوا، وزیر اعلیٰ نے کہا کہ جنوبی پنجاب کا ہر ضلع، ہر شہر اور ہر گاؤں ترقی کے عمل میں شریک ہوگا۔
انہوں نے مزید کہا کہ دیہات تک رسائی پراجیکٹ کے تحت دیہی علاقوں کی سڑکوں کی تعمیر و مرمت کی جائے گی، جنوبی پنجاب میں نئے اسپتال، کالج اور یونیورسٹیاں بنائی جارہی ہیں۔
