پاکستان تحریک انصاف کے رہنما عثمان ڈار نے کہا ہے کہ پیمرا کیبل آپریٹرز پر ذمے داری ڈالنے کے بجائے اے آر وائی بحال کرے۔
پی ٹی آئی رہنما عثمان ڈار نے سماجی رابطوں کی ویب سائٹ ٹوئٹر پر اپنے بیان میں کہا ہے کہ سندھ کے بعد آج اسلام آباد ہائیکورٹ نے بھی اے آر وائی نیوز کی فوری بحالی کا حکم دیا ہے، عدالتی احکامات واضح ثبوت ہیں کہ چینل کی بندش کا عمل غیر قانونی ہے۔
اے آروائی نیوز براہِ راست دیکھیں live.arynews.tv پر
عثمان ڈار نے ٹوئٹ میں کہا ہے کہ پیمرا کیبل آپریٹرز پر ذمے داری ڈالنے کے بجائے چینل بحال کرے، اگر چینل بحال نہیں کیا جاتا ہے تو اس کے خلاف توہین عدالت کی کاروائی شروع کی جائے۔
سندھ ہائیکورٹ کے بعد آج اسلام آباد ہائیکورٹ نے بھی ARY نیوز کی فوری بحالی کا حکم دیا ہے، عدلیہ کے احکامات اس بات کا واضح ثبوت ہیں کہ چینل کی بندش کا عمل غیرقانونی ہے، پیمرا کیبل آپریٹرز پر ذمہ داری ڈالنے کی بجائے چینل بحال کرے ورنہ اس کے خلاف توہین عدالت کی کاروائی شروع کی جائے!
— Usman Dar (@UdarOfficial) September 1, 2022
واضح رہے کہ سندھ ہائیکورٹ کے بعد آج اسلام آباد کی اعلیٰ عدالت نے بھی اے آر وائی نیوز کی نشریات کی فوری بحالی کا حکم دیا ہے۔
اسلام آباد ہائیکورٹ میں اے آر وائی نیوز کی بندش کے خلاف سماعت ہوئی جس میں چینل کی جانب سے درخواست گزار ملازمین عدالت میں پیش ہوئے اور صحافیوں کی بھی بڑی تعداد موجود تھی۔
عدالت نے کہا کہ پیمرا کا تحریری آرڈر نہیں ہے تو اے آر وائی نیوز کی فوری نشریات بحال کی جائیں اور اگر کوئی تحریری آرڈر ہے تو کل صبح ساڑھے 10 بجے آکر وضاحت دیں۔
عدالت نے چیئرمین پیمرا کو کل عدالت پیشی کے لیے مجاز افسر مقرر کرنے کا حکم دیتے ہوئے کہا مجاز افسر عدالت کے سامنے پیش ہو کر وضاحت کرے۔
