سابق آسٹریلوی پیسر مچل جانسن کی تنقید کے بعد ڈیوڈ وارنر کے ساتھی اوپنر عثمان خواجہ ان کے دفاع میں سامنے آگئے۔
آسٹریلوی لیفٹ ہینڈ اوپنر کو پاکستان کے خلاف ہوم ٹیسٹ سیریز کے لیے 14 رکنی ٹیسٹ اسکواڈ میں منتخب کیا گیا ہے۔ وارنر نے ٹیسٹ سیریز کے بعد طویل فارمیٹ سے اپنی ریٹائرمنٹ کا اعلان کررکھا ہے۔
اوپنر کی ٹیسٹ اسکواڈ میں شمولیت پر مچل جانسن نے سخت تنقید کرتے ہوئے کہا تھا کہ انھیں ٹیسٹ فیئر ویل ہرگز نہیں دینا چاہیے کیوں کہ وہ آسٹریلوی کرکٹ کی تاریخ کے سب سے بڑے تنازع میں ملوث رہے ہیں۔
عثمان نے جانسن کے خیالات سے اختلاف کرتے ہوئے کہا کہ وارنر اور سابق کپتان اسٹیو اسمتھ نے آسٹریلوی کرکٹ کے لیے بہت کچھ کیا ہے اور ’سینڈ پیپر گیٹ‘ اسکینڈل میں انھیں 12 ماہ کی سزا ہوئی تھی جو ان کے لیے کافی تھی۔
خواجہ کا ذرائع ابلاغ سے گفتگو کرتے ہوئے کہنا تھا کہ میرے دماغ میں وارنر اور اسمتھ ہیرو ہیں۔ انھوں نے اپنی کرکٹ کا ایک سال گنوا دیا۔ کوئی بھی پرفیکٹ نہیں ہوتا نہ مچل جانسن پرفیکٹ ہیں۔
انھوں نے کہا کہ یہ کہنا کہ ڈیو وارنر یا سینڈ پیپر گیٹ میں شامل کوئی اور ہیرو نہیں ہے، میں اس سے متفق نہیں ہوں کیونکہ انھوں نے اپنی سزا بھگت لی ہے۔ کرکٹ سے ایک سال باہررہنا طویل عرصہ ہوتا ہے۔
واضح رہے کہ آسٹریلیا کے سابق لیف آرم پیسر جانسن نے کالم ڈیوڈ وانر کو شدید تنقید کا نشانہ بنایا تھا اور انھیں ہیرو کی طرح ٹیسٹ فیئرویل دینے کی مخالفت کی تھی۔
