کراچی: معروف ٹی وی اداکار عثمان پیرزادہ کا کہنا ہے کہ سرمد صہبائی ان کی زندگی کی اہم شخصیت ہیں اور وہ سرمد سے بے حد متاثر تھے۔
تفصیلات کے مطابق معروف پاکستانی اداکار عثمان پیرزادہ نے اے آر وائی ڈیجیٹل کے پروگرام شان سحور میں شرکت کی اور اپنی زندگی کے بارے میں بتایا۔
عثمان نے بتایا کہ سرمد صہبائی ان کی زندگی میں ایک اہم مقام رکھتے ہیں، وہ ان کی شخصیت سے بہت متاثر تھے جبکہ ان کے ڈراموں کو دیکھ کر حیران رہ گئے تھے۔
ثمینہ پیرزادہ سے اپنی شادی کے بارے میں انہوں نے بتایا کہ ثمینہ اپنی ایک کزن کے ساتھ ان کے ڈرامے کی شوٹنگ دیکھنے آئی تھیں، وہ عثمان کو اسی وقت اچھی لگیں اور انہوں نے ثمینہ کو اپنے گھر پر مدعو کیا۔
اس کے بعد دونوں خاندانوں میں ملاقاتیں شروع ہوگئیں۔ عثمان نے بتایا کہ ثمینہ کی والدہ کو ان کی ایکٹنگ کے بارے میں تحفظات تھے جو شادی کے آڑے آرہے تھے۔
اس کے بعد ایک دن ثمینہ نے خود ہی انہیں پروپوز کردیا جس کے بعد ان دونوں نے گھر میں کسی کو بتائے بغیر نکاح کرلیا۔
عثمان پیرزادہ نے اپنی زندگی، کام اور خاندان کے بارے میں بھی بہت کچھ شیئر کیا۔
