پشاور زلمی کے عثمان قادر نے عمراکمل کو آؤٹ کرنے پر پرچہ لہرانے کی وجہ بتا دی۔
لیگ اسپنر عثمان قادر نے کوئٹہ گلیڈی ایٹرز کے خلاف شاندار بولنگ کرتے ہوئے 3 وکٹیں حاصل کر کے ٹیم کی کامیابی میں اہم کردار ادا کیا۔
انہوں نے عمراکمل، افتخاراحمد اور جیمز وینسے کی اہم وکٹیں حاصل کیں اور کوئٹہ کے لیے مطلوبہ ہدف کا حصول ناممکن بنا دیا۔
عمراکمل عثمان قادر کی گیند پر پوری طرح بیٹ ہو گئے اور اپنے توازن برقرار نہ رکھ سکے اسی اثناء میں وکٹ کیپر نے پلک جھپکے بیلز اڑا کر بلے باز کو اسٹمپ کر دیا۔
.@Umar96Akmal didn’t have a chance with this one. Off he goes!#HBLPSL7 l #LevelHai l #PZvQG pic.twitter.com/VaYZgXKn2u
— PakistanSuperLeague (@thePSLt20) February 15, 2022
عمراکمل کی وکٹ لینے پر عثمان قادر نے جیت سے ایک پرچہ نکالا اور اسے بلے باز کی جانب دیکھتے ہوئے لہرایا۔ کیمرے کی آنکھ نے اس لمحے کو محفوظ کر لیا جب کہ فیلڈ میں موجود ساتھی کھلاڑیوں نے پرچہ لہرانے پر تجسس کا اظہار کیا۔
تجربہ کار شعیب ملک قریب پہنچے اور اشارے سے پرچہ واپس جیب میں ڈالنے کا کہا، لیکن کوئی نہیں جانتا تھا کہ پرچہ لہرانے کی وجہ کیا ہے۔
میچ کے اختتام پر گفتگو کرتے ہوئے عثمان قادر نے کہا کہ پرچے میں لکھا تھا ‘اللہ سب سے بڑا تخلیق کار ہے’۔ ان کا کہنا تھا کہ کیمرہ ٹھیک سے فوکس نہیں کرپایا اس لیے پرچے میں لکھا پیغام دیکھا نہیں جا سکا۔
