کراچی: ترجمان جے یو آئی اسلم غوری نے کہا ہے کہ یوٹیلیٹی اسٹورز ختم کرنے کا فیصلہ منسوخ کیا جائے، غریب کے منہ سے نوالہ چھینا جارہا ہے۔
جمعیت علمائے اسلام کے ترجمان اسلم غوری کا کہنا تھا کہ یوٹیلیٹی اسٹورز کو ختم کرنے کا فیصلہ غریب عوام کے منہ سے نوالہ چھیننے کے مترادف ہے، ملک کی اشرافیہ کو مراعات دی جارہی ہیں اور غریب سے جینے کا حق چھینا جارہا ہے۔
اسلم غوری نے کہا کہ یوٹیلیٹی اسٹورز سے عام آدمی کو روزمرّہ کی اشیا معقول نرخوں پر میسر ہیں، اسٹورز کے خاتمے سے ہزاروں ملازمین بے روزگار ہو جائیں گے۔
وفاقی حکومت نے ملک بھر میں چلنے والے یوٹیلیٹی اسٹورز مکمل طور پر بند کرنے اور بینظیر انکم سپورٹ کے تحت ملنے والی سبسڈی کو ختم کرنے کا فیصلہ کیا ہے۔
ذرائع کا کہنا تھا کہ اسٹوروں کو بند کرنے کا فیصلہ فنڈز کی کمی کے باعث کیا گیا ہے، دوسری جانب عوام کے ساتھ ساتھ اسٹورز پر ملازمت کرنے والے ملازمین بھی اس فیصلے پر پریشان ہیں۔
یوٹیلیٹی اسٹورز دو ہفتوں میں بند کرنے کے فیصلے پر ملازمین احتجاج کر رہے ہیں، ملازمین کا کہنا تھا کہ حکومت یوٹیلیٹی اسٹوروں کو ہمارے حوالے کرے، ہم ٹیکس اور تنخواہیں دیں گے۔
ملازمین نے کہا کہ حکومت نے اسٹوروں کو بند کرنے کا فیصلہ کر لیا مگر ہزاروں ملازمین کے حوالے سے کچھ نہیں سوچا، حکومت کو اپنا فیصلہ واپس لینا پڑے گا۔
دوسری جانب عوام کا کہنا ہے کہ پہلے ہی مہنگی بجلی اور ٹیکسز کے بوجھ تلے دبے عوام سے یوٹیلیٹی اسٹوروں پر ملنے والا ریلیف بھی چھینا جارہا ہے۔
