مرزا پور : بھارت میں زمین کے تنازعے نے دو افراد کی جان لے لی، ایک شخص نے اپنے بہنوئی کو قتل کرنے کے بعد خود کو گولی مار کر زندگی کا خاتمہ کرلیا۔
بھارتی ریاست اتر پردیش کے ضلع مرزا پور میں گزشتہ روز قتل کا واقعہ پیش آیا، 39سالہ شخص نے اپنے بہنوئی کو قتل کرنے کے بعد خودکشی کرلی، اطلاعات کے مطابق دونوں کے درمیان پرانا زمینی اور مالیاتی تنازعہ تھا۔
بھارتی میڈیا کے مطابق دنیش شرما عرف پنٹو نامی ملزم نے بکریا گاؤں میں بہنوئی گوپال جی کے گھر جاکر اس پر فائرنگ کی، واردات کے بعد ملزم جائے وقوعہ سے فرار ہوگیا، تاہم بنکٹ گاؤں پہنچنے کے بعد دنیش نے خود کو بھی گولی مارلی۔
پولیس کے مطابق دنیش کے پاس لائسنس یافتہ 12 بور ریپیٹر بندوق تھی جس سے وہ موقع پر ہی دم توڑ گیا، تاہم گوپلاجی کو اسپتال لے جایا گیا جہاں وہ بھی زخموں کی تاب نہ لاتے ہوئے ہلاک ہوگیا۔ پولیس نے جائے وقوعہ سے ایک ریپیٹر گن، 17کارتوس اور خالی خول برآمد کئے۔
