کراکس: اقوام متحدہ نے وینزویلا میں جاری سیاسی بحران اور درجنوں شہریوں کی ہلاکتوں کا الزام حکومت پر عاید کردیا۔
تفصیلات کے مطابق دارالحکومت کراکس سمیت ملک کے مختلف علاقوں میں حکومت مخالف مظاہروں کا سلسلہ تاحال برقرار ہے، جبکہ اقوام متحدہ نے مظاہرے کے دوران کئی شہریوں کی ہلاکتوں کا الزام ملکی حکومت پر عاید کیا ہے۔
غیر ملکی خبر رساں ادارے کے مطابق اقوام متحدہ نے اپنی حالیہ رپورٹ میں انکشاف کیا ہے کہ وینزویلا حکومت جبری طور پر عوامی رائے تبدیل کررہی ہے۔
رپورٹ میں کہا گیا ہے کہ حکومت کے ہاتھوں عام شہریوں کے ہلاکتوں کی تعداد چونکا دینے والی ہے، مذکورہ رپورٹ آج اقوام متحدہ کی انسانی حقوق کونسل میں پیش کی جائے گی۔
اقوام متحدہ نے یہ بھی انکشاف کیا ہے کہ پولیس کی جانب سے مخالفین کو گرفتار کرکے ماوارئے عدالت قتل بھی کیا جارہا ہے، اور ردعمل سے بچنے کے لیے ان پر من گھڑت الزامات عاید کیے جارہے ہیں۔
وینزویلا میں اپوزیشن لیڈر جون گائیڈو کی حمایت دن بہ دن بڑھتی چلی جارہی ہے، امریکا سمیت کئی یورپی ریاستوں نے بھی جون گائیڈو کی حمایت کا اعلان کیا ہے۔
وینزویلا بحران، امریکا نے وزراء پر نئی پابندیاں عائد کردیں
دوسری جانب رواں ماہ کے آغاز میں امریکی محکمہ خزانہ نے وینزویلا کے بجلی کے وزیر لوئس موتا ڈومنگوئئز اور ملک کے نائب وزیر خزانہ یوسٹکیو جوس لگو گومیزا کے خلاف نئی پابندیاں عائد کی ہیں۔
یاد رہے کہ امریکی انتظامیہ نے رواں سال اپریل میں وینزویلا کے مرکزی بینک اور اس کے سربراہ الیانا جوزفا روزا تیران پر پابندیاں لگانے کا فیصلہ کیا تھا۔
