گزشتہ دنوں دنیا بھر میں لوگوں نے اپنے آسمان پر پورے چاند کے ساتھ ساتھ دو روشن ستاروں کو بھی دیکھا جو دراصل سیارہ زہرہ اور مشتری تھے، لیکن امریکی ریاست کیلی فورنیا میں لوگوں نے اس نظارے سے گھبرا کر ایمرجنسی سروس کو کالز کرنا شروع کردیں۔
جمعرات کی شام سے زہرہ اور مشتری آسمان پر دو جھلملاتے ستاروں کی صورت چمکتے ہوئے دکھائی دے رہے ہیں۔
دونوں سیاروں کا ملاپ مغربی افق پر صرف نصف ڈگری کے زاویے سے دیکھا گیا جسے دوربین کے بغیر عام آنکھ سے دیکھا جا سکتا ہے۔
عموماً زہرہ اور مشتری کا ملاپ سال میں ایک بار یا ہر 13 ماہ بعد ہوتا ہے لیکن اس سال دونوں سیاروں کے درمیان واضح فاصلہ پچھلے سال کے مقابلے میں خاصا کم تھا۔
دنیا بھر میں فلکیات سے دلچسپی رکھنے والے افراد کے ساتھ ساتھ عام افراد نے بھی اس نظارے کو دلچسپی سے دیکھا تاہم امریکی ریاست کیلی فورنیا کے رہائشیوں نے گھبرا کر ایمرجنسی سروس کو فون گھما دیے۔
کیلی فورنیا کے قانون نافذ کرنے والے حکام نے سوشل میڈیا پر پوسٹ کیا کہ لوگ 911 کو کال کر کے انہیں آسمان پر چمکنے والے دو ستاروں کے بارے میں بتانے سے گریز کریں۔
حکام کا کہنا ہے کہ لوگ انہیں کال کر کے بتا رہے ہیں کہ آسمان پر 2 غیر معمولی روشنیاں دکھائی دے رہی ہیں جو اپنی جگہ ساکت ہیں، ان کے خیال میں یہ کوئی مشتبہ چیز ہوسکتی ہے جس کے بارے میں حکام کو تحقیق کرنے کی ضرورت ہے۔
کال کرنے والوں کو بتایا گیا کہ یہ ایک معمول کا فلکیاتی مظہر ہے جس کے بارے میں پہلے ہی خبریں دی جاچکی ہیں۔
سوشل میڈیا پر حکام کی جانب سے ہدایات دیے جانے کے بعد 911 پر کی جانے والی کالز میں خاصی کمی آئی۔
