لکھنؤ : سفاک انسان نے اپنے دشمن سے بدلہ لینے کیلئے اس کے معصوم بچوں کی زندگیاں داؤ پر لگا دیں، بچوں کو گاڑی کے نیچے کچلنے کی کوشش کی۔
بھارتی ریاست اترپردیش کے شہر لکھنؤ میں دشمنی کی آگ میں جلنے والے ایک شخص نے اپنے دشمن کے تین بچوں کو اپنی گاڑی تلے روند ڈالا جس دوران تینوں بچے شدید زخمی ہوگئے۔
سوشل میڈیا پر وائرل ہونے والی دلخراش واقعے کی اس ویڈیو میں دیکھا جاسکتا ہے کہ ملزم اپنی سفید کار سڑک پر چلنے والے بچوں سے ٹکرا دیتا جس سے صاف ظاہر ہوررہا ہے کہ وہ ان معصوموں کو پہیوں کے نیچے کچلنے کی کوشش کر رہا ہے۔
بھارتی میڈیا کی رپورٹ کے مطابق بچوں کے باپ وریندر عرف سیتارام نے ملزم گوندا کیخلاف ایف آئی آر درج کروائی ہے جس کے مطابق سیتارام کے 3 بچے جن میں شیوانی، سنیہا اور کرشنا گھر کے قریب مارکیٹ کیلئے جارہے تھے کہ جہاں ملزم گوندا نے ان پر گاڑی چڑھانے کی کوشش کی۔
میڈیا رپورٹس کے مطابق حادثے میں تینوں بچے شدید زخمی ہوئے ہیں جو اسپتال میں زیر علاج ہیں۔
اس حوالے سے مزید بتایا جارہا ہے کہ ایک اور ویڈیو بھی منظر عام پر آئی جس میں گوندا بچوں کو گاڑی سے ٹکر مارنے کے بعد بھاگ رہا ہے تاہم موقع پر موجود لوگوں نے گوندا کو پکڑلیا۔
پولیس کے مطابق پولیس نے ملزم گوندا کو حراست میں لے لیا ہے جبکہ ملزم کیخلاف مزید قانونی کارروائی کی جارہی ہے۔
