The news is by your side.

Advertisement

منشیات فروشوں اور پولیس اہل کاروں کے درمیان لین دین کی ویڈیو سامنے آ گئی

کراچی: شہر قائد میں پولیس اہل کاروں اور منشیات فروشوں کا گٹھ جوڑ سامنے آ گیا ہے، اورنگی ٹاؤن میں اس گٹھ جوڑ کی ویڈیو بھی اے آر وائی نیوز کو موصول ہو گئی ہے۔

تفصیلات کے مطابق اورنگی ٹاؤن میں پولیس اہل کاروں اور منشیات فروشوں کے درمیان گٹھ جوڑ کا ویڈیو ثبوت سامنے آ گیا ہے، اے آر وائی نیوز کو موصول ویڈیو میں پولیس اہل کاروں کو منشیات فروش سے لین دین کرتے دیکھا جا سکتا ہے۔

ویڈیو میں 4 پولیس اہل کاروں کو واضح طور پر دیکھا جا سکتا ہے، راستے میں موٹر سائیکل پر بیٹھا پولیس اہل کار کھلم کھلا منشیات فروش سے لین دین کر رہا تھا، اس دوران کار میں بیٹھے ایک شہری نے ویڈیو بنانی شروع کر دی۔

ویڈیو بنانے والے شہری کو ڈرانے کے لیے پولیس اہل کار بھی اس کی ویڈیو بنانے لگا، اہل کار ڈھٹائی کے ساتھ موبائل ہاتھ میں تھامے شہری کے خلاف بولتا رہا، اور ڈرانے کے لیے کہتا رہا کہ پولیس اہل کار گشت پر ہیں اور یہ شہری ویڈیو بنا رہا ہے۔

تاہم، شہری خوف زدہ ہوئے بغیر پولیس اہل کار اور منشیات فروش کی ویڈیو بناتا رہا، شہری کا کہنا تھا کہ یہ منشیات بیچنے والے لوگ ہیں، اور پولیس اہل کاروں کے سامنے بیچ رہے ہیں اور اہل کار کچھ نہیں کہہ رہے، یہ بھتے بھی لیتے ہیں۔

ویڈیو میں منشیات فروشوں کو بھی واضح طور پر دیکھا جا سکتا ہے، لین دین کے بعد چار پولیس اہل کار دو موٹر سائیکلوں پر بیٹھ کر چلے گئے۔

اے آر وائی نیوز کے مطابق مذکورہ ویڈیو پاکستان بازار اور مومن آباد تھانے کی حدود کے درمیان موجود علاقے کی ہے، پاکستان بازار تھانے کی حدود میں منشیات فروشی کا اڈہ بھی موجود ہے۔

واضح رہے کہ منشیات فروش کبھی مومن آباد تھانے کبھی پاکستان بازار تھانے کی حدود میں اپنے اڈے تبدیل کرتے رہتے ہیں، گزشتہ ماہ ضلع غربی میں 2 پولیس اہل کاروں کو مومن آباد تھانے کی حدود میں منشیات فروشوں نے یرغمال بنا کر انھیں تھپڑ مار کر تشدد بھی کیا تھا، جس پر حکام بالا نے نوٹس لے لیا تھا۔

fb-share-icon0
Tweet 20

Comments

comments

یہ بھی پڑھیں