فن کسی کی میراث نہیں بلکہ عطائے خداوندی ہے جو آئے روز مختلف انداز میں دنیا میں منظر عام پر آتا رہتا ہے اور لوگ اسے دیکھ کر حیران رہ جاتے ہیں۔
سوشل میڈیا پر ایک ویڈیو وائرل ہو رہی ہے جس کی جگہ تو معلوم نہیں مگر یہ کسی آرٹ گیلری کی لگتی ہے جہاں ایک ایسے فنکار کے فن پارے نمائش کے لیے رکھے گئے ہیں جس نے ناکارہ سمجھ کر کچرے میں پھینک دی جانیوالی چیزوں کو کارآمد بناتے ہوئے ناقابل یقین فن پارے تشکیل دیے ہیں۔
ویڈیو میں دیکھا جا سکتا ہے کہ ایک فنکار نے مختلف پورٹریٹ بنائے ہیں جس کے لیے کسی مخصوص کینوس یا رنگ کا استعمال نہیں کیا گیا بلکہ ان چیزوں کا استعمال کیا گیا ہے جو عموماً لوگ استعمال کے بعد ناقابل استعمال ہونے پر ناکارہ یا فالتو سمجھ کر ڈسٹ بن میں ڈال دیتے ہیں۔
اس فنکار نے ٹوٹی ہوئی فالتو زپ، بوتلوں کے غیر استعمال شدہ ڈھکن، کپڑوں کی کترن، جینز کی پینٹ کے بیلٹ کے لوپس، کیپسول وٹیبلیٹ پر مشتمل ادویات اور بجلی کے کٹے ہوئے ناکارہ تاروں کا استعمال کرتے ہوئے ایسے ایسے فن پارے تشکیل دیے ہیں کہ دیکھنے والا حیران رہ جاتا ہے۔
ان فن پاروں کی خاص بات یہ ہے کہ دور سے دیکھنے ایسا لگتا ہے کہ ان تصاویر کو بنانے میں رنگوں کا استعمال کیا گیا ہے جب قریب جاکر دیکھا جائے تو حقیقت آشکار ہوتی ہے کہ یہ رنگ نہیں بلکہ کچھ اور ہے۔
