جیسلمیر: بھارت میں شادی سے چند روز قبل دلہن کو اغوا کرنے اور صحرا کے بیچ جبراً شادی کرنے کی ویڈیو وائرل ہوگئی۔
بھارتی میڈیا کے مطابق راجستھان کے شمال مغربی میں واقع جیسلمیر ضلع میں ایک 23 سالہ نوجوان خاتون کو اس کی شادی سے کچھ دن قبل اغوا کیا گیا تھا، لڑکی کے گھر والوں کو شادی روکنے کے لیے جبراً اسے اٹھا کر پھیرے لینے کی کوشش کی جس کی ویڈیو وائرل ہوگئی۔
وایرل ہونے والی ویڈیو میں دیکھا جاسکتا ہے کہ آگ کے گرد گھوم کر شادی کی رسم ادا کرنے کے دوران متاثرہ لڑکی مدد مانگ رہی ہے جبکہ اردگرد دیگر لوگ اور ایک خاتون بھی موجود ہے۔
اس واقعے کے حوالے سے مقامی پولیس نے بتایا کہ اہلخانہ نے الزام لگایا کہ ملزم زبردستی ان کی بیٹی کو گھر کے باہر سے اٹھا لے گئے تھے، اس دوران انہوں نے بیٹی سے زبردستی شادی کی اور اس کی ویڈیو بنائی۔
اہلخانہ کا کہنا ہے کہ ان کی بیٹی کو یکم جون کو گھر کے باہر سے مردوں کے ایک گروپ نے اغوا کیا تھا۔
پولیس نے بتایا کہ لڑکی کو اسی دن بچا لیا گیا تھا اور مرکزی ملزم کی شناخت پسپیندر سنگھ (28) کے نام سے ہوئی ہے جسے جیل بھیج دیا گیا ہے۔
تاہم منگل کو کچھ شرپسندوں نے ویڈیو کو سوشل میڈیا پلیٹ فارمز پر پھیلا دیا۔
ویڈیو وائرل ہونے کے بعد لڑکی کے خاندان نے جیسلمیر میں ضلع کلکٹریٹ کے دفتر کے باہر احتجاج کیا اور اس معاملے میں کارروائی کا مطالبہ کیا۔
اہلخانہ کا کہنا ہے کہ میری بیٹی کی شادی 12 جون کو مقرر ہے اور ملزمان اس کی شادی میں خلل ڈالنے کے لیے ہمیں مسلسل دھمکیاں دے رہے ہیں۔
اہلخانہ نے الزام لگایا کہ پولیس نے صرف ایک ملزم کو گرفتار کیا ہے جبکہ باقی آزاد گھوم رہے ہیں۔
پولیس کا کہنا ہے کہ ملزمان کی جائیداد ضبط کر دی جائے گی، اور مفرور ملزمان کو جلد گرفتار کر لیا جائے گا۔
