کراچی: شہر قائد کے علاقے گلستان جوہر بلاک 4 میں لڑکی کو ہراساں کرنے کرنے والے ملزم کی مزید فوٹیجز اور تفصیلات اے آر وائی نیوز نے حاصل کرلیں۔
گلستان جوہر بلاک 4 میں تین روز قبل افسوسناک واقعہ پیش آیا تھا جہاں گلی میں عبایا پہن کر گذرتی لڑکی کو ایک اوباش لڑکے کی جانب سے حملہ کرکے شدید ہراساں کیا گیا۔
اس واقعے کی اہم فوٹیجز تو سامنے آچکی ہی لیکن اے آر وائے نیوز نے اہم پیش رفت کے ساتھ مزید فوٹیجز اور تفصیلات حاصل کرلی ہیں۔
پولیس حکام کے مطابق واقعہ صبح 11:30 سے 11:40 کے درمیان پیش آیا تھا، پولیس کا کہنا ہے ابتدائی تحقیقات کے مطابق ایسا لگتا ہے کہ متاثرہ لڑکی گھروں میں کام کرتی ہے۔
کراچی: گلستان جوہر میں راہ چلتی لڑکی پر جنسی حملہ
فوٹیج میں لڑکی کو پہلے گلی میں بائیں جانب دکان کی طرف جاتے دیکھا جاسکتا ہے جہاں سے اس نے کچھ سامان خریدا اورخاتون کے واپس جاتے وقت ملزم کو پیچھا کرتے دیکھا جاسکتا ہے۔
پولیس ذرائع کے مطابق ملزم شرمناک حرکت کرنے سے پہلے موقع ڈھونڈتا رہا، بظاہر ملزم نے حرکت کرنے سے قبل مکمل منصوبہ بندی کی تھی اور اپنی شناخت چھپانے کے لیے نا صرف فیس ماسک کا استعمال کیا بلکہ موٹرسائیکل کی نمبرپلیٹ بھی اتار دی تھی۔
پولیس حکام کے مطابق اب تک 20 کے قریب علاقہ مکینوں سے بیانات لیے گئے ہیں، ملزم کی مذید فوٹیجز اور تصاویر سرکولیٹ کردی گئی، جبکہ لڑکی سے متعلق علاقے کی ماسیوں سے تفصیلات حاصل کررہے ہیں تاکہ اس کو تحفظ کا احساس دلا کر اس کی مدعیت میں مقدمہ درج کیا جاسکے۔
پولیس کا کہنا ہے کہ جلد ملزم کو گرفتار کرلیا جائے گا۔
