نئی دہلی : بھارت میں حکومت مخالف مظاہرہ کرنے والے کسانوں پر تشدد مظالم کا سلسلہ جاری ہے کسان کو گاڑی سے کچلنے کی ایک اور ویڈیو منظر عام پر آگئی۔
بھارتی ریاست اتر پردیش کے لکھیم پور کھیری تشدد کی ایک اور ویڈیو سامنے آئی ہے، جس میں ٹکر مارنے والی جیپ سے اتر کر کچھ لوگ بھاگ رہے ہیں اور پہیے کے نیچے ایک کسان دبا ہوا ہے۔
اتر پردیش کے لکھیم پور کھیری کے واقعہ کی ویڈیوز اب دھیرے دھیرے سامنے آنے لگی ہیں۔ کسانوں پر گاڑی چڑھانے والی ویڈیو کے بعد اب ایک اور ویڈیو سامنے آئی ہے جس میں ٹکر مارنے والی جیپ سے اتر کر کچھ لوگ بھاگتے نظر آ رہے ہیں۔
جیپ جہاں رکی ہے اس کے پچھلے پہیے کے پاس ایک شخص زخمی حالت میں پڑا ہے اور پیچھے کئی لوگ بھاگتے نظر آرہے ہیں۔
वस्त्रोलॉजी (कपड़ों से मनुष्य को पहचानने की कला) के विशेषज्ञ आज वीडियो देख कर भी अन्नदाताओं के क़ातिलों को नहीं पहचान पा रहे हैं। pic.twitter.com/mATx7qnl6X
— Prof. Gourav Vallabh (@GouravVallabh) October 5, 2021
ویڈیو کو کانگریس ترجمان گورو ولبھ نے بھی اپنے ٹوئٹر اکاؤنٹ سے شیئر کیا ہے اور لکھا ہے کہ وسٹرولوجی (کپڑوں سے انسان کو پہچاننے کا فن) کے ماہرین آج ویڈیو دیکھ کر بھی اَن داتاؤں کے قاتلوں کو نہیں پہچان پا رہے ہیں۔
سوشل میڈیا میں وائرل ہونے والی اس ویڈیو میں جیپ میں سوار دو لوگ کسانوں کو کچلنے کے بعد گاڑی سے بھاگتے نظر آ رہے ہیں۔
اس حوالے سے مختلف ذرائع سے کہا جا رہا ہے کہ مرکزی وزیر اجے مشرا کے بیٹے آشیش مشرا نے ہی تھار کو کسانوں کے اوپر چڑھایا تھا۔ واقعہ کے بعد گاڑی سے اتر کر وہ بھاگ گیا تھا۔
کہا یہ بھی جا رہا ہے کہ ویڈیو میں جیپ سے نکل کر بھاگنے والے لوگوں میں آشیش مشرا بھی شامل ہے۔ حالانکہ مرکزی وزیر اجے مشرا کا کہنا ہے کہ ان کا بیٹا جائے وقوعہ پر موجود نہیں تھا۔
واضح رہے کہ اس سے قبل ایک اور ویڈیو سامنے آئی تھی۔ ویڈیو میں ایک گاڑی کسانوں کو کچلتے دیکھی گئی تھی۔ اس میں صاف دیکھا گیا تھا کہ کس طرح ایک گاڑی جھنڈے اور بینر لے کر آگے بڑھ رہے کسانوں کو پیچھے سے روندتے ہوئے آگے بڑھ جاتی ہے۔
ایک کسان کار کے بونٹ پر جا گرتا ہے۔ اس کے بعد موقع پر بھگدڑ مچ جاتی ہے۔ کچھ لوگ اس سیاہ رنگ کی گاڑی سے کچلے جاتے ہیں، تو کچھ لوگ دھکّے سے دور جا گرتے ہیں۔
کسانوں کو روندتے ہوئے یہ گاڑی آگے بڑھ جاتی ہے۔ اس کے پیچھے ہی کچھ سیکنڈ کے اندر ایک دوسری کار بھی کچل کر آگے بڑھ جاتی ہے۔
