گلوکار و اداکار گوہر ممتاز نے فرحان سعید کے ’جل‘ بینڈ سے علیحدگی کی وجہ بتادی۔
’جل‘ بینڈ کی بنیاد 2002 میں عاطف اسلم، گوہر ممتاز اور فرحان سعید نے ساتھ رکھی تھی اور ان کے گانے ’دل ہارے پُکارے۔‘ ’سجنی۔‘ ’عادت‘۔ اور ’وہ لمحے۔‘ کو خوب سراہا گیا تھا۔
تاہم عاطف اسلم کے ’جل‘ بینڈ سے الگ ہونے کے بعد یہ ٹوٹ گیا۔
عاطف اسلم تینوں میں سب سے کامیاب رہے اور انہوں نے پاکستان ہی نہیں بھارت میں بھی سپر ہٹ گانے گائے۔
گوہر ممتاز اور فرحان سعید نے گلوکاری کے بعد مختلف ڈراموں میں اداکاری کے جوہر بھی دکھائے۔
تاہم اب گوہر ممتاز نے ایک انٹرویو میں انکشاف کیا ہے کہ فرحان سعید نے علیحدگی اس لیے اختیار کی کیونکہ وہ عاطف اسلم کے نقش قدم پر چلنا چاہتے تھے۔
انہوں نے کہا کہ فرحان سعید بالی ووڈ میں جاکر عاطف اسلم بننا چاہتے تھے، میں ان سے کہتا تھا کہ تم جانتے ہو۔۔۔ وہ عاطف اسلم ہے۔‘ اسے وہ گانے ملے جنہوں نے اسے صحیح وقت پر مقبول بنایا۔
گوہر ممتاز نے فرحان سعید کے فیصلے پر مایوسی کا اظہار کرتے ہوئے کہا کہ جل ان کے لیے اپنی صلاحیتوں کو ظاہر کرنے کا بہترین پلیٹ فارم تھا۔
گلوکار نے کہا کہ انہیں فرحان سعید کے فیصلے سے تکلیف ہوئی ہے کیونکہ انہوں نے ایک اوسط گلوکار کو ہٹ کرنے کے لیے بہت زیادہ محنت کی تھی۔
