بھارتی ریاست اتراکھنڈ میں مون سون کی بارشوں نے تباہی مچا دی ہے، شہر ہریدوار میں دریائے گنگا میں بہت ساری کاریں بہہ گئیں۔
بھارتی میڈیا رپورٹس کے مطابق موسلا دھار بارش سے ہریدوار میں دریائے گنگا میں زبردست طغیانی آئی، جس میں کئی کاریں بہہ گئیں، سوشل میڈیا پر وائرل ہونے والی کئی ویڈیوز میں گاڑیاں دریا میں تیرتی دکھائی دے رہی ہیں۔
ہندوستان کے محکمہ موسمیات نے شمال مغربی ہندوستان میں مزید شدید بارشوں کی پیش گوئی کی ہے، اور ممکنہ سیلاب کی وارننگ دی ہے۔ اتراکھنڈ ریاست میں 27 جون کو اس سال کے مون سون سیزن کے آغاز پر شدید بارشیں ہوئیں، جس سے گنگا میں طغیانی آئی۔
مقامی حکام نے رہائشیوں اور زائرین کو خطرناک حالات کے پیش نظر دریا میں نہانے سے گریز کرنے کا مشورہ دیا۔ اس سے قبل 27 جون کو ہندوستان کے محکمہ موسمیات نے خبردار کیا تھا کہ شمالی ہندوستان کے کچھ اور حصوں میں بھی مون سون کے حالات شدید ہو سکتے ہیں۔
اگلے دو یا تین دنوں میں مدھیہ پردیش، چھتیس گڑھ، مغربی بنگال، جھارکھنڈ، بہار، اتر پردیش، دہلی، چندی گڑھ اور ہریانہ، اتراکھنڈ، ہماچل پردیش اور جموں کے کچھ حصوں میں شدید بارشیں ہو سکتی ہیں۔