صوبہ بلوچستان کے ضلع آواران میں کبوتروں کی ایسی میراتھن ریس منعقد کی جاتی ہے جسے دیکھ کر عقل دنگ رہ جاتی ہے، ساڑھے 5 سو کلو میٹر کا فاصلہ طے کرنے کے لیے ان کبوتروں کو سخت ٹریننگ دی جاتی ہے۔
بلوچستان میں مختلف کلبز کے زیر اہتمام ان کبوتروں کی میراتھن منعقد کی جاتی ہےجس کی فنشنگ لائن 560 کلو میٹر دور ہوتی ہے، جس کے بعد کبوتر واپس اپنے گھروں کو لوٹتے ہیں۔
یہ فاصلہ 5 سے 6 گھنٹے کے دوران طے ہوتا ہے، حال ہی میں منعقد ہونے والی ریس کا فاتح کبوتر یہ فاصلہ ساڑھے 5 گھنٹے میں طے کر کے واپس لوٹا۔
ریس کے منتظمین کا کہنا ہے کہ ریس شروع ہونے سے قبل کبوتروں کو نشان لگا کر انہیں کوڈ نمبر دیے جاتے ہیں۔
ان کبوتروں کے مالکان کا کہنا ہے کہ کبوتروں کے لیے لاکھوں روپے کی امپورٹڈ ادویات اور خوراک کا انتظام کیا جاتا ہے، ان کی ٹریننگ کے مختلف مرحلے ہیں جس کا آغاز 5 سے 10 کلو میٹر تک اڑانے سے ہوتا ہے، رفتہ رفتہ یہ فاصلہ 100 کلو میٹر تک بڑھایا جاتا ہے۔
