بھارت میں خاتون ڈاکٹر کو مبینہ طور پر جنسی ہراساں کرنے کے الزام میں ملزم کو گرفتار کرنے کے لیے پولیس موبائل سمیت ایمرجنسی وارڈ میں داخل ہوگئی۔
بھارتی میڈیا رپورٹس کے مطابق نئی دہلی کے ایمس رشیکیش اسپتال میں خاتون ڈاکٹر کو جنسی طور پر ہراساں کرنے کے الزام میں مرد نرسنگ افسر کو گرفتار کرنے کے لیے پولیس گاڑی سمیت اسپتال کے چوتھے فلور کر پہنچ گئی جس کی ویڈیو سوشل میڈیا پر وائرل ہوگئی۔
ویڈیو میں دیکھا جاسکتا ہے کہ پولیس موبائل ملزم کو گرفتار کرنے کے لیے چوتھے فلور کے ایمرجنسی وارڈ میں جارہی ہے جبکہ ارد گرد ہجوم بھی جمع ہے جب موبائل وارڈ میں پہنچتی ہے تو سیکیورٹی عملے کی جانب سے مریضوں کے اسٹریچر راستے سے ہٹائے جارہے ہیں۔
رپورٹ کے مطابق پولیس موبائل کو اسپتال کے وارڈ میں داخل ہوتے دیکھ کر مریض اور ان اہلخانہ بھی گھبرا گئے اور ہر طرف افرا تفری مچ گئی۔
بعدازاں نرسنگ افسر ستیش کمار کو پولیس نے حراست میں لے لیا جبکہ اسپتال انتظامیہ نے بھی ملزم کو معطل کردیا ہے۔
View this post on Instagram
پولیس کے مطابق ستیش کمار پر اسپتال کی جونیئر خاتون ڈاکٹر نے ٹراما سرجری یونٹ میں جنسی طور پر ہراساں کرنے کا الزام لگایا تھا اور بتایا تھا کہ ملزم نے انہیں فحش مسیج بھیجا تھا۔
پولیس کا بتانا ہے کہ اسپتال کے کمپاؤنڈ میں رہائش پذیر ڈاکٹروں نے بھی جنسی ہراسگی کے مبینہ واقعے کے خلاف احتجاج کیا تھا اور ملزم کے خلاف کارروائی کا مطالبہ کیا تھا۔
