نئی دہلی: بھارتی کرکٹ ٹیم کے سابق کپتان ویرات کوہلی کا دورہ جنوبی افریقہ کی وائٹ بال سیریز سے بریک لینے کا امکان ہے۔
بھارتی میڈیا رپورٹ کے مطابق بھارت کے اسٹار بیٹر ویرات کوہلی صرف ٹیسٹ سیریز کا حصہ ہوں گے، انہوں نے اپنے فیصلے سے بھارتی بورڈ کو آگاہ کر دیا ہے۔
ویرات کوہلی نے بورڈ سے وائٹ بال سیریز سے بریک لینے کی بات کی ہے، وہ باکسنگ ڈے سے سنچورین میں شروع ہونے والے پہلے ٹیسٹ کا حصہ ہوں گے۔
ویرات کوہلی کے بارے میں کہا جارہاہے کہ وہ اس وقت لندن میں چھٹیوں پر ہیں، ورلڈ کپ فائنل میں آسٹریلیا کے ہاتھوں عبرتناک شکست کے بعد کھیل سے دور وقت گزار رہے ہیں۔
’ویرات کوہلی اور روہت شرما آج ہی ریٹائرمنٹ کا اعلان کریں‘
دوسری جانب بھارتی کرکٹ ٹیم کے کپتان روہت شرما کی بھی دستیابی کے بارے میں ابھی کچھ واضح نہیں ہے، ورلڈ کپ کے بعد وہ ان دنوں انگلینڈ میں چھٹیاں منا رہے ہیں۔
بھارتی میدیا کا کہنا ہے کہ بھارتی بورڈ کے سیکرٹری جے شاہ جلد روہت شرما سے ان کے وائٹ بال کرکٹ کے مستقبل پر بات کریں گے۔
خیال رہے کہ دورہ جنوبی افریقا میں 2 ٹیسٹ، 3 ون ڈے اور 3 ٹی ٹوئنٹی میچز کی سیریز شامل ہے۔
