بھارتی کرکٹ ٹیم کے کپتان ویرات کوہلی نے متحدہ عرب امارت میں جاری انڈین پریمیئر لیگ ( آئی پی ایل) کے 2021 کے سیزن کے بعد اپنی ٹیم رائل چیلنجرز بنگلور کی کپتانی بھی چھوڑنے کا اعلان کردیا ہے۔
ویرات کوہلی نے اعلان کیا کہ وہ آئی پی ایل کے جاری ایڈیشن کے بعد اپنی ٹیم رائل چیلنجرز بنگلور کے کپتان کے عہدے سے سبکدوش ہو جائیں گے، کوہلی نے ایک ویڈیو پیغام میں اپنے مداحوں کو بتایا کہ آئی پی ایل کا رواں سیزن بحیثیت کپتان رائل چیلنجرز بنگلور میرا آخری سیزن ہوگا ۔
کوہلی نے کہا کہ میں اپنا آخری آئی پی ایل میچ کھیلنے تک رائل چیلنجرز بنگلور کا کھلاڑی رہوں گا ساتھ ہی میں اس ٹیم کے تمام شائقین کا شکریہ ادا کرتا ہوں کہ انہوں نے مجھ پر یقین کیا اور مجھے سپورٹ کیا۔
یہ بھی پڑھیں: ویرات کوہلی کا اچانک ٹی 20 کی کپتانی چھوڑنے کا اعلان
واضح رہے کہ ویرات کوہلی 2013 سے رائل چیلنجرز بنگلور کی کپتانی کررہے ہیں مگر وہ اب تک ایک بھی آئی پی ایل ٹائٹل جیت نہیں سکے۔
یاد رہےکہ کچھ روز قبل بھارتی کرکٹ ٹیم کے کپتان ویرات کوہلی نے ٹی ٹوئنٹی ورلڈکپ2021 کے بعد مختصر فارمیٹ کی کپتانی چھوڑنےکا بھی اعلان کیا تھا۔
