کراچی: شہر قائد میں خفیہ اطلاع پر مطلوب منشیات فروش عبد اللہ اور فہیم اللہ کو گرفتار کر لیا گیا۔
تفصیلات کے مطابق تھانہ مدینہ کالونی پولیس کی خفیہ اطلاع پر کامیاب کارروائی میں مطلوب 2 منشیات فروش ملزمان منشیات و اسلحہ سمیت گرفتار کر لیے گئے۔
ایس ایس پی کیماڑی فدا حسین جانوری کے مطابق تھانہ مدینہ کالونی پولیس کو آفریدی کالونی 7 نمبر قبرستان کے پاس منظم گروہ کی جانب سے منشیات فروشی کی اطلاع موصول ہوئی تھی۔
مذکورہ مقام کی ریکی کے بعد ایس پی بلدیہ ڈویژن مغیث احمد ہاشمی کی نگرانی میں ایس ایچ او تھانہ مدینہ کالونی سب انسپکٹر محمد اسلم نے بھاری نفری کے ہمراہ چھاپا مار کارروائی کی۔
چھاپے کے دوران عبداللہ ولد غلام نبی اور فہیم اللہ ولد غلام نبی نامی مطلوب منشیات فروش ملزمان کو گرفتار کیا گیا، جن کے قبضے سے 2600 گرام چرس اور غیر قانونی 30 بور پستول مع ایمونیش برآمد ہوا۔
پولیس حکام کے مطابق ملزمان پیشہ ور عادی منشیات فروش ہیں جو کہ اس سے قبل بھی گرفتار ہو چکے ہیں، ملزمان کے خلاف اینٹی نارکوٹکس ایکٹ و سندھ آرمز ایکٹ کے تحت مقدمات درج کر کے مزید تفتیش کی جا رہی ہے۔
