اردو کے ممتاز شاعر صبا اکبر آبادی کو بطور صحافی اور مترجم بھی پہچانا جاتا ہے۔ صبا اکبر آبادی نے کئی واقعات اور ادبی تذکرے بھی لکھے اور ان کی ایسی تحریروں کی بدولت ہمیں کئی دہائیوں پہلے کے مشاہیر اور ادبی سرگرمیوں کے بارے میں جاننے کا موقع ملتا ہے۔
صبا صاحب نے پاکستان کے شہر راول پنڈی میں منعقدہ ایک مشاعرے کا یہ احوال رقم کرتے ہوئے بتایا ہے کہ شعر سن کر تالیاں بجانا خلافِ ادب ہے اور اگر سامعین باشعور اور تہذیب یافتہ ہوں تو اچھے شعر پر داد دیتے ہیں۔ وہ لکھتے ہیں:
راول پنڈی میں میرے ایک دوست سمت پرکاش جین ایکسٹرا اسسٹنٹ کمشنر لگے ہوئے تھے۔ جین ہونے کے باوجود اردو زبان اور شعر کے عاشق دل دادہ تھے۔ راول پنڈی اور نواح کے تمام اردو شاعروں سے ان کے گہرے مراسم تھے، جن میں عبدالعزیز فطرت، تلوک چند محروم، فیض احمد فیض نمایاں تھے۔
راول پنڈی کے کمشنر نے وار فنڈ (war fund) کے سلسلے میں ایک ’کل ہند‘ مشاعرے کا اہتمام کیا، وہاں جگر، سیماب، صوفی تبسم، ساغر نظامی، عابد علی، تلوک چند محروم نے بھی شرکت فرمائی۔ حفیظ ہوشیار پوری ریڈیو کی جانب سے غالباً مشاعرے کی کارروائی ریکارڈ کرانے کے لیے تشریف لائے تھے، اس لیے کلام نہیں سنایا۔ مشاعرہ ایک سینما ہال میں منعقد ہوا تھا۔ اگلی صف میں ایک جانب انگریز اور دیگر افسران کی کرسیاں تھیں، تو دوسری جانب عمائدین شہر کے بیٹھنے کا انتظام تھا۔
مشاعرے کے آغاز میں سمت پرکاش جین نے ’سپاس نامہ‘ پڑھا اور بتایا کہ اس مشاعرے کی تمام آمدنی ’جنگی فنڈ‘ میں دی جائے گی۔ حسرت موہانی نے اپنے خطبۂ صدارت میں انگریزوں کو مخاطب کر کے کہا کہ ہم لوگ آپ سے بحیثیت قوم اور انسان عداوت نہیں رکھتے، بلکہ اس طرز حکومت کے خلاف ہیں جو آپ نے ہندوستان میں قائم کر رکھی ہے اور جس کا ڈھلتا سورج ہماری آنکھیں دیکھ رہی ہیں۔ ہم اس مشاعرے میں آپ کی محبت میں نہیں، بلکہ نازی ازم اور فاشزم کے خلاف اپنے جذبات کا اظہار کرنے جمع ہوئے ہیں۔ مولانا کی پرجوش تقریر پر سامعین تالیاں بجا کر ان کی تائید کر رہے تھے۔ گورے افسران بھی گاہ گاہ تالیاں بجا دیتے تھے۔ آخر میں مولانا نے سامعین کو مخاطب کر کے کہا اب میں آپ سے عرض کروں گا کہ شعرا کی غزلوں پر تالیوں کی جگہ داد دی جائے یا خاموشی اختیار کی جائے کیوں کہ مشاعرے کے آداب یہی ہیں۔
