مانچسٹر: ملتان میں ویسٹ انڈیز کے خلاف فاتحانہ آغاز پر رد عمل میں سابق کپتان وسیم اکرم نے خوشی کا اظہار کرتے ہوئے کہا کہ ٹیم درست سمت میں جا رہی ہے۔
وسیم اکرم نے اے آر وائی نیوز سے خصوصی گفتگو کرتے ہوئے پاکستان ٹیم کو کامیابی پر مبارک باد دی، اور کہا کہ آج ٹیم نے بہت اچھی کرکٹ کھیلی، خیال رہے کہ پاکستان نے ویسٹ انڈیز کو پہلے ون ڈے میں 5 وکٹوں سے شکست دے کر سیریز میں ایک صفر کی برتری حاصل کر لی ہے۔
وسیم اکرم نے کہا ٹیم نے ملتان کی گرمی میں آرام سے 300 سے اوپر کا ہدف حاصل کیا، مجھے بڑی خوشی ہے کہ ٹیم درست سمت میں جا رہی ہے، بطور پاکستانی ہمیں اپنی ٹیم کو سپورٹ کرنا چاہیے۔
انھوں نے چیئرمین پی سی بی رمیز راجہ کو سراہتے ہوئے کہا کہ وہ زبردست کام کر رہے ہیں، وسیم اکرم نے کہا مجھے خوشی ہے کہ رمیز راجہ ہر چیز میں شامل ہو کر کام کر رہے ہیں اور انھیں پتا ہے کہ کیا کرنا چاہیے۔
پاکستان کا ویسٹ انڈیز کیخلاف فاتحانہ آغاز
لیجنڈ بولر نے کہا کہ پی ایس ایل کا گزشتہ سیزن کرونا سے متاثر ہوا مگر اب سب بہتر ہوگا، اگر ہر ٹیم کا اپنا ہوم گراؤنڈ ہو تو پھر اور زیادہ مزہ آئے گا۔
کرکٹ بورڈ سے متعلق دیگر مسائل پر انھوں نے تبصرہ کیا کہ آئیڈیل تو یہ ہے کہ پروفیشنل باڈیز کو خود مختار بنایا جائے، اور پی سی بی اور دیگر بورڈز خود سربراہان کا انتخاب کریں تو وہی اچھا ہے۔
