قومی ٹیم کے سابق کپتان وسیم اکرم نے ٹی 20 ورلڈ کپ کے لیے 4 سیمی فائنلسٹ ٹیموں کی پیش گوئی کردی۔
سماجی رابطے کی ویب سائٹ ایکس (ٹوئٹر) پر میزبان فخر عالم نے وسیم اکرم سے گفتگو کی ویڈیو شیئر کی جس میں انہوں نے سابق کپتان سے پاک انگلینڈ سیریز، ورلڈ کپ سیمی فائنلسٹ ٹیموں سے متعلق پوچھا۔
وسیم اکرم نے کہا کہ ٹی 20 ورلڈ کپ میں میری پسندیدہ ٹیم آسٹریلیا ہے، اس کے بعد بھارت، پاکستان اور ویسٹ انڈیز ہیں، جنوبی افریقہ اور سری لنکا بھی اچھی ٹیمیں ہیں۔
ایک سوال کے جواب میں وسیم اکرم نے کہا کہ گروپ میں پاکستان کے لیے آئرلینڈ خطرہ ثابت ہوسکتی ہے کیونکہ یہ ٹی 20 ہے ایک اچھا اسپیل بھی گیم کا پانسہ پلٹ سکتا ہے۔
فخر عالم نے پوچھا کہ پاک انگلینڈ کی سیریز سے آپ خوش ہیں؟
جواب میں وسیم اکرم نے کہا کہ میرا خیال ہے کہ پاک انگلینڈ سیریز کے نتائج سے کوئی خوش نہیں کیونکہ چار میں سے دو میچز بارش کی نذر ہوگئے اور یوں لگ رہا تھا جیسے جو میچ ملے ہار جاؤ لیکن اب امید ہے کہ پاکستان ورلڈ کپ میں بہتر پرفارمنس دے گی۔
انہوں نے کہا کہ جب بھی کوئی ٹیم ورلڈ کپ میں جاتی ہے تو انہیں علم ہوتا ہے کہ ان کے پہلے گیارہ کھلاڑی کون سے ہیں، اس کے بعد انہیں پچز اور کنڈیشن کو مدنظر رکھتے ہوئے کمبینیشن کو سمجھنا ہوتا ہے۔
