بھارت میں نوجوان ویڈیو بنواتے ہوئے آبشار میں بہہ گیا جس کی ویڈیو سوشل میڈیا پر وائرل ہوگئی۔
بھارتی میڈیا رپورٹس کے مطابق ریاست کرناٹک میں نوجوان اتوار کی شام شیوموگا کے کولور کے قریب اراسینا گنڈی آبشار میں انسٹاگرام ریل بناتے ہوئے دیکھا گیا۔
ویڈیو بنانے کے دوران نوجوان کا پاؤں پھسلا اور وہ آبشار میں بہہ گیا۔
المناک واقعہ کیمرے میں اس وقت ریکارڈ ہوا جب اس کا دوست ویڈیو بنا رہا تھا اور وہ پرفارم کررہا تھا۔
ویڈیو میں دیکھا جاسکتا ہے نوجوان ویڈیو بنوانے میں مصروف ہے کہ اچانک اس کا پاؤں پھسلتا ہے اور وہ سیدھا آبشار میں گر جاتا ہے۔
ಧಾರಾಕಾರ ಮಳೆಯ ಹಿನ್ನಲೆ ಜಲಪಾತ ವೀಕ್ಷಣೆಗೆಂದು ತೆರಳಿದ್ದ ಯುವಕ ಕಾಲು ಜಾರಿ ನೀರು ಪಾಲಾದ ಘಟನೆ #Udupi ಜಿಲ್ಲೆಯ ಅರಶಿನಗುಂಡಿ ಜಲಪಾತದ ಬಳಿ ನಡೆದಿದೆ.#WesternGhats #Karnatakarains #Monsoon2023 pic.twitter.com/N7fsEWqgG9
— Karnataka Rains⛈️ (@Karnatakarains) July 24, 2023
رپورٹ کے مطابق ریسکیو ٹیمیں نوجوان کو تلاش کررہی ہیں تاہم اس کا ابھی تک کوئی پتا نہیں چل سکا ہے جبکہ واقعے کا مقدمہ بھی کولور تھانے میں درج کرلیا گیا ہے۔
واضح رہے کہ کرناٹک میں موسلا دھار بارشوں کے پیش نظر اورنج الرٹ جاری کیا گیا ہے اور اڈوپی، دھارواڑ سمیت دیگر خطوں کے اسکولوں اور کالجوں میں تعطیل کا اعلان کیا گیا ہے۔
یاد رہے کہ گزشتہ سال نومبر میں بیلگاوی ضلع میں آبشار کے قریب سیلفی لیتے ہوئے چار لڑکیوں کی موت ہوگئی تھی۔
