امریکا میں مسافر بردار طیارہ ہائی وے پر گاڑیوں پر آگرا جس کے نتیجے میں دو افراد ہلاک ہوگئے۔
غیرملکی خبررساں ادارے کی رپورٹ کے مطابق جنوب مغربی فلوریڈا ہائی وے پر طیارے نے ہنگامی لینڈنگ کی کوشش کی اس دوران حادثے کے نتیجے میں 2 افراد ہلاک ہوگئے۔
نجی طیارہ لینڈنگ کے دوران دو کاروں سے ٹکرا گیا، حادثے کے باعث طیارے میں آگ بھڑک اٹھی۔
فلوریڈا ہائی وے حکام کا کہنا ہے کہ طیارے نے ہائی وے پر ایک پک اپ ٹرک کو ٹکر ماری، بمبارڈیئر چیلنجر 600 نامی طیارے میں حادثے کے وقت پانچ افراد سوار تھے۔
رپورٹ کے مطابق طیارے نے کولمبس اوہائیو میں واقع اوہائیو اسٹیٹ یونیورسٹی کے ہوائی اڈے سے تقریباً ایک بجے دوپہر اڑان بھری اور کچھ دیر میں اسے لینڈنگ کرنا تھی۔
قتيلان بعد تحطم طائرة خاصة على طريق سريع في #فلوريدا اصطدمت في سيارة فور هبوطها بعد تعطل محركها#العربية pic.twitter.com/jVuqHEfQGl
— العربية (@AlArabiya) February 10, 2024
پائلٹ نے کنٹرول ٹاور کو فون کیا اور ہنگامی لینڈنگ کی درخواست کرتے ہوئے کہا کہ طیارے کے دونوں انجن کام نہیں کررہے پھر ٹاور سے رابطہ منقطع ہوگیا، چند منٹوں کے بعد ایئرپورٹ حکام نے ہائی وے سے دھواں اٹھتے دیکھا۔
فائر بریگیڈ نے جائے وقوعہ پر پہنچ کر جہاز میں سوار پانچ افراد میں سے تین کو ملبے سے زندہ نکال لیا جبکہ دو افراد ہلاک ہوگئے۔
