The news is by your side.

Advertisement

ہم بھائی بھائی ہیں، پوپ فرانسس کا دورہ یو اے ای سے قبل پیغام

ویٹی کن سٹی: رومن کیتھولک کے روحانی پیشوا پوپ فرانسس نے کہا ہے کہ وہ آئندہ اتوار کو متحدہ عرب امارات کے دورے سے مذاہب کے درمیان تعلقات کی تاریخ کا ایک نیا باب رقم کرنا چاہتے ہیں۔

غیرملکی خبررساں ادارے کے مطابق اماراتی عوام کے لیے پوپ فرانسس نے اپنے پیغام میں کہا کہ ہم اگر چہ مختلف ہیں لیکن ہم بھائی بھائی ہیں، مجھے خوشی ہے کہ میں آپ کی سرزمین پر مذاکرات کے دوران تعلقات کا ایک نیا باب رقم کرنا چاہتا ہوں۔

پوپ فرانسس نے ابوظبی کے ولی عہد شیخ محمد بن النہیان کا دورے کی دعوت دینے پر شکریہ ادا کیا، وہ ایک بین المذاہب اجلاس میں شرکت کریں گے، یہ اجلاس 3 سے 5 فروری تک ابوظبی میں منعقد ہوگا۔

انہوں نے کہا کہ اس دورے کے دوران انہیں دوست اور بھائی شیخ احمد الطیب سے ملاقات کا ایک اور موقع میسر آئے گا، دونوں مذہبی رہنماؤں کے درمیان اس سے پہلے 2017 میں ملاقات ہوئی تھی۔

مزید پڑھیں: لوگ مادہ پرستی چھوڑ کرسادہ زندگی گزاریں، پوپ فرانسس

پوپ فرانسس نے کہا کہ بین المذاہب اجلاس اس بات پر آمادگی کے عکاس ہیں کہ خدا پر ایمان ہی دراصل لوگوں کو جوڑنے کی اصل وجہ ہے یہی نظریہ آپسی اختلافات کے باوجود سب کو قریب بھی لاتا ہے۔

انہوں نے کہا کہ متحدہ عرب امارات کی سرزمین مختلف تہذیبوں اور ثقافتوں کے ملاپ کا ایک نمونہ ہے جہاں غیر ملکیوں کو کام کے لیے ایک محفوظ جگہ مل جاتی ہے اور وہ آزادانہ رہ سکتے ہیں۔

واضح رہے کہ متحدہ عرب امارات کی 80 فیصد آبادی مسلم ہے جبکہ عیسائی مذہب سے تعلق رکھنے والے 9 فیصد ہیں، مختلف ممالک سے تعلق رکھنے والے مسیحی تارکین وطن یو اے ای میں بطور ورکر کام کررہے ہیں۔

Comments

comments

یہ بھی پڑھیں