کراچی: سابق صدرِ مملکت اور پاکستان پیپلز پارٹی پارلیمینٹیرین کے سربراہ آصف علی زرداری نے کہا ہے کہ ہم بے نظیر بھٹو سمیت جمہوریت، آئین اور قانون کے لیے قربان ہونے والے دیگر شہداء کو سلام پیش کرتے ہیں۔
سابق صدر آصف علی زرداری نے یہ بات بینظیر بھٹوکی نویں برسی کے موقع پر اپنے پیغام میں کہی انہوں نے شہید محترمہ بینظیر بھٹو کو زبردست خراجِ عقیدت پیش کرتے ہوئے کہا کہ بینظیر بھٹو کا وژن جدید، ترقی پسنداورخوشحال پاکستان تھا۔
انہوں نے کہا کہ شہید محترمہ کوپتا تھا کہ مذہبی انتہا پسند بھیڑیے انہیں راستے سے ہٹانے کے در پہ تھے اس کے باوجود محترمہ کاعزم مسلح مذہبی انتہاپسندوں کیخلاف جنگ جاری رکھنا تھا حالانکہ محترمہ کے پاس آسان راستہ موجود تھا کہ وہ انتہاپسندوں کی مزاحمت ترک دیتیں لیکن وہ پاکستانیوں کے لیے خوشحالی کاخواب دیکھتی تھیں اوراس خواب کوشرمندہ تعبیرکرنے کے لے انہوں نے اپنی جان تک قربان کردی۔
آصف زرداری نے کہا کہ آج ہمارے سر انہیں خراج عقیدت پیش کرتے ہوئے جھکے ہوئے ہیں، کسی کو پیپلزپارٹی کیخلاف سازشیں کرنے میں کامیاب نہیں ہونے دیں گے،یہ سازشی ہرقیمت پرشکست سے دوچار ہوں گے کیوں کہ پیپلز پارٹی کی تحریک میں شہیدوں کا خون شامل ہے۔
یاد رہے محترمہ بے نظیر بھٹو نے 27 دسمبر 2007 کو روالپنڈی میں جلسہ گاہ سے نکلنے کے بعد ایک خود کش دھماکے میں جام شہادت نوش کر لی تھی اور کل شہید بی بی کی نویں برسی عقیدت و احترام کے ساتھ منائی جا رہی ہے۔