چلاس: شاہراہ بابوسر ناران اور بابوسر ٹاپ کے مقام پر موسمی خرابی کے باعث برفانی تودے، گلیشئر اور لینڈ سلائیڈنگ کا شدید خطرہ پیدا ہو گیا ہے۔
تفصیلات کے مطابق ڈپٹی کمشنر دیامر فیاض احمد نے کہا ہے کہ موسمی خرابی کے باعث شاہراہ بابوسر ناران اور بابوسر ٹاپ کے مقام پر برفانی تودے، گلیشئر اور لینڈ سلائیڈنگ کا شدید خطرہ ہے، زیرو پوائنٹ سے ٹریفک روکنے کے احکامات جاری کر دیے گئے ہیں۔
انھوں نے بتایا کہ بابوسر شاہراہ 8 ماہ بند ہونے سے جگہ جگہ سلائیڈنگ سے روڈ تنگ ہو گئے ہیں، ون وے کلیئر کر کے ٹریفک ریگولیشن کے مطابق بحال کیا جا رہا ہے، تاہم 2 کلو میٹر برف کے باعث ٹریفک متاثر ہونے کا خدشہ ہے۔
ڈی سی کا کہنا تھا کہ این ایچ اے کو روڈ کلیئر کرنے کے احکامات جاری کیے گئے ہیں، کچھ گاڑیاں آج ٹاپ سے بغیر اطلاع گلگت بلتستان میں داخل ہوئیں، ایک گاڑی بابوسر کے مقام پر حادثے کا شکار ہونے سے 3 افراد زخمی ہوئے۔
انھوں نے کہا کہ بابوسر شاہراہ کو مکمل کلیئر کرنے کے بعد باقاعدہ نوٹیفکیشن کیا جائے گا، شاہراہ بابوسر پر مکمل پابندی عائد کر دی گئی ہے۔
واضح رہے کہ گزشتہ روز پولیس نے ایک بیان جاری کرتے ہوئے کہا تھا کہ بابوسر ناران روڈ برف ہٹانے کے بعد ٹریفک کے لیے کھول دیا گیا، ابتدائی طور پر بابوسر ناران روڈ پر چھوٹی گاڑیوں کے لیے سفر کی اجازت دی گئی ہے۔ پولیس کا کہنا تھا کہ بابوسر روڈ کھلتے ہی ناران سائیڈ سے آنے والا کیری ڈبہ بابوسر کے مقام پر حادثے کا شکار ہو گیا، جس میں 3 افراد زخمی ہو گئے، جنھیں آر ایچ کیو اسپتال منتقل کیا گیا۔
پولیس کا کہنا تھا کہ تا حکم ثانی بابوسر ناران روڈ پر رات کو سفر کرنے پر پابندی عائد ہے، رات کو سفر کرنے پر پابندی کے پیش نظر زیرو پوائنٹ کے مقام پر سیاحوں کو روکا جانے لگا ہے۔
ادھر کمشنر دیامر استور ڈویژن التمش جنجوعہ نے اپنے بیان میں کہا ہے کہ سیاح اور ٹرانسپورٹرز بابوسر ناران جھلکڈ شاہراہ پر سفر سے اجتناب کریں، بابوسر ناران روڈ کو کھولنے کے لیے بھاری مشینری سے برف کی کٹائی کی گئی تھی، جس سے باقی ماندہ برف پگھل کر سلائیڈنگ کا خطرہ ہے۔
انھوں نے کہا بابوسر شاہراہ کو مکمل کھولنے کے لیے مشینری بابوسر ٹاپ کے دونوں اطراف کام کر رہی ہے، بابوسر روڈ پر سلائیڈنگ اور پھسلن کی وجہ سے ہر قسم کی ٹریفک پر پابندی عائد ہے، خلاف ورزی کرنے والے کسی بھی حادثے کے خود ذمہ دار ہوں گے۔
