مانسہرہ / مظفرآباد : مانسہرہ کے سیاحتی مقام ناران جھیل سیف الملوک اور بابو سرٹاپ پر برفباری جاری ہے، گلگت بلتستان اور کشمیر میں بھی پہاڑوں نے برف کی سفید چادر اوڑھ لی۔
تفصیلات کے مطابق مانسہرہ کے سیاحتی مقام ناران جھیل سیف الملوک اور بابو سرٹاپ پر وقفے وقفے سے برفباری کا سلسلہ جاری ہے، پہاڑوں نے سفید چادر اوڑھ لی، بابوسر ٹاپ پر پارہ منفی پانچ تک گرگیا۔
موسم کا حال بتانے والوں نے گلگت بلتستان اور کشمیر میں بارش اور پہاڑوں پر مزید برفباری کی نوید سنائی ہے، گزشتہ چوبیس گھنٹے کے دوران کوئٹہ میں کم سے کم پارہ آٹھ، اسلام آباد میں دس، لاہور اور ملتان میں اٹھارہ ڈگری سینٹی گریڈ رہا۔
کراچی میں کم سے کم پارہ تئیس ڈگری ریکارڈ کیا گیا۔ دوسری جانب آزاد کشمیر کے مختلف علاقوں میں گزشتہ تین روز سے وقفے وقفے سے جاری رہنے والی بارش کے ساتھ پہاڑوں پر بھی برف جمی ہے، بارش اور برف باری کے باعث موسم سرد اور خوشگوار ہوگیا، سیاحوں کی بڑی تعداد بھی حسین وادیوں کی جانب چل پڑی۔
انتظامیہ کے مطابق پہاڑی علاقوں میں لینڈ سلائیڈنگ کاخدشہ ہے، بارش اور برف باری کے دوران شہری غیرضروری سفرسے گریزکریں۔
خیال رہے کہ اس وقت ملک بھر میں سردی کی آمد آمد ہے، ملک کے بڑے حصوں میں بارشیں اور برف باری بھی جاری ہے۔
سردی کی لہر سے بالائی علاقے شدید متاثر ہونے کا خدشہ ہے، گلگت بلتستان کے بالائی علاقوں میں برف باری سے نظام زندگی متاثر ہو رہا ہے۔
