پاکستان کے نامور گلوکار اور اداکار علی ظفر کا کہنا ہے جب فلم کے لیے بھارت گیا تو کترینہ کیف کا اردو کا استاد میں تھا کیونکہ انہیں اردو نہیں آتی تھی۔
لاہور میں ہونے والے پاکستان لٹریچر فیسٹیول کے دوران میٹ دی اسٹار سیشن میں گفتگو کرتے ہوئے علی ظفر کا کہنا تھا میں ایک علإی گھرانے سے تعلق رکھتا ہوں، گھر میں ہمیشہ گھر میں پروگریسو گفتگو ہوتی تھی۔
اداکار و گلوکار کا کہنا تھا خوبیاں، خامیاں ہر کسی میں ہوتی ہیں اس لیے اچھے اور برے میں نہیں، درمیان میں دیکھنا چاہیے، میرے والد پوچھتے تھے زندگی میں کیا کرو گے اگر سی ایس ایس نہیں کرنا؟ لیکن مجھے بچپن سے پتہ تھا کہ میں کیا بننا چاہتا ہوں۔
علی ظفر کا کہنا تھا کہ میں یہ نہیں چاہتا تھا کہ میری گاڑی اور نمبر پلیٹ دیکھ کر لوگ میری عزت کریں، میں چاہتا تھا کہ لوگ میرے کام کی وجہ سے میری عزت کریں، طیفا ان ٹربل اس لیے بنائی تاکہ پاکستان کو فخر ہو، پاکستان میں بہت ٹیلنٹ ہے۔
علی ظفر نے کہا کہ میں نے کترینہ کیف کو کہا کہ شادی اپنی اپنی، نہ وہ شادی میں آئیں، نہ میں گیا، کترینہ کیف بہت محنتی اداکارہ ہیں اور کام پر فوکس کرتی ہیں، میں کترینہ کیف کا اردو کا استاد تھا کیونکہ ان کو اردو نہیں آتی تھی۔
