انٹرنیٹ ایک وسیع اور پیچیدہ نیٹ ورک ہے اور اس کا ایک بڑا حصہ عام صارف کی نظر سے اوجھل رہتا ہے جسے ڈارک ویب کہتے ہیں۔
"ڈارک ویب” انٹرنیٹ کے ایک مخصوص حصے کا نام ہے جو "ڈیپ ویب” کا ذیلی حصہ ہے۔ ڈیپ ویب میں وہ تمام مواد شامل ہے جو معیاری سرچ انجنز (جیسے گوگل) کے ذریعے انڈیکس نہیں کیا جاتا۔
ڈارک ویب تک رسائی کے لیے خاص سافٹ ویئر کی ضرورت ہوتی ہے، اس میں ایسی سائٹس شامل ہیں جو گوگل سرچز پر نظر نہیں آتیں۔
ڈارک ویب سائٹس تک رسائی کے لیے ٹور براؤزر نامی سافٹ ویئر کی ضرورت ہوتی ہے جو صرف ٹور نیٹ ورک پر دستیاب ہوتے ہیں۔
دی اونین راؤٹر ٹور صارف کے انٹرنیٹ ٹریفک کو انکرپٹ کرتا ہے اور اسے رضا کاروں کے زیرِ انتظام سرورز کے ایک نیٹ ورک کے ذریعے روٹ کرتا ہے، جس سے صارف کا مقام اور شناخت چھپ جاتی ہے۔ یہ پرائیویسی کی تہہ اُن لوگوں کو اپنی طرف متوجہ کرتی ہے جو نگرانی یا سینسر شپ سے بچنا چاہتے ہیں۔
ڈارک ویب کھلنے کے بعد بالکل عام ویب سائٹ جیسی نظر آتی ہے، اس میں ڈارک نیٹ مارکیٹس ہوتی ہیں جہاں غیر قانونی کاروبار ہوتا ہے جس میں غیر اخلاقی مواد، اسلحہ، کسی بھی ویب سائیٹ یا شخصیات کا ہیک کیا گیا ڈیٹا اور جھوٹا آرٹ اور پینٹگز بیچی جاتی ہیں، یہاں پر خرید و فروخت کے لیے خصوصی کرنسی مثلاً بٹ کوائن کا استعمال کیا جاتا ہے۔
منشیات، جعلی پاسپورٹ یا فحش مواد کی خرید و فروخت بٹ کوائن کے ذریعے کی جاتی ہے۔ یہ انٹرنیٹ کی دنیا میں سب سے تیزی سے پھیلنے والی کیٹیگری ہے۔ کریڈٹ کارڈز کی معلومات ہیک کر کے یہاں بہت سستے داموں بیچی جاتی ہے۔
ڈارک ویب پر مختلف قسم کا مواد پایا جاتا ہے، جس میں قانونی اور غیر قانونی دونوں شامل ہیں، وکی لیکس اور پروجیکٹ ویریٹاس جیسے پلیٹ فارمز ڈارک ویب کا استعمال کرتے ہیں تاکہ اپنے ذرائع کو محفوظ رکھا جاسکے اور معلومات شائع کی جا سکیں۔
جو صارفین آن لائن نگرانی سے پریشان ہوں، وہ گمنام رابطے کے لیے ڈارک ویب استعمال کر سکتے ہیں۔ سلک روڈ” جیسی آن لائن مارکیٹس غیر قانونی منشیات کی خرید و فروخت کے لیے استعمال ہوتی ہیں۔
صرف وہی افراد ان ویب سائٹس تک پہنچ سکتے ہیں جن کا تعلق انٹرنیٹ جرائم کی اس دنیا سے ہو یا پھر وہ اس کمیونٹی کا حصہ ہوں۔ یہ ویب سائٹس فائر والز کے پیچھے چھپی ہوتی ہیں۔
اس کے علاوہ ڈارک ویب بچوں کے جنسی استحصال کے مواد کا بڑا مرکز ہے۔ یہاں سے کرائے کے قاتلوں کا ملنا بھی ممکن ہے۔
ڈارک ویب کے نقصانات و خطرات
ڈارک ویب کی گمنامی کے ساتھ کئی خطرات بھی جڑے ہیں، ڈارک ویب کی گمنامی دھوکہ دہی کرنے والوں کو پہچاننا اور سزا دینا مشکل بناتی ہے، یہاں پر بدنیتی پر مبنی سافٹ ویئر اور ہیکنگ کی سرگرمیاں عام ہیں۔ ڈارک ویب پر غیر قانونی سرگرمیوں میں ملوث ہونا سنگین قانونی نتائج کا باعث بن سکتا ہے۔
