ریاض: سعودی حکام نے عمرہ انشورنس پیکج کے حوالے سے معلومات دیتے ہوئے ان طبی معاملات کی نشاندہی کی ہے جو پیکج میں شامل نہیں ہیں۔
اردو نیوز کے مطابق سعودی حکام کا کہنا ہے کہ بیرون مملکت سے آنے والے عمرہ زائرین کو انشورنس پیکج میں 11 صورتوں میں پالیسی سے کوئی فائدہ نہیں ہوگا۔
حکام کا کہنا ہے کہ انشورنس پیکج میں نان ایمرجنسی ٹریٹمنٹ اور معائنہ جات، مصنوعی دانت لگوانا، فکسڈ یا موبائل برج کی تنصیب سے متعلق ٹریٹمنٹ شامل نہیں۔
علاوہ ازیں آنکھ یا کان میں خرابی کے ٹیسٹ، سماعت و بصارت کے آلات کی اصلاح، چھ ماہ سے زیادہ مدت کے حمل کا معائنہ و علاج، طبعی موت یا طبعی معذوری، اگر انشورنس کروانے والا کوئی ایسا کام کرے جس سے اس کی موت یا مکمل معذوری ہوجائے، تب وہ کیس پیکج میں شامل نہیں۔
انشورنس کروانے والے کی میت اس کے وطن کے سوا کسی اور ملک بھیجنے کے اخراجات بھی ادا نہیں کیے جائیں گے۔
حکام کا کہنا ہے کہ فضائی کمپنی کی جانب سے پرواز میں تاخیر کی اطلاع، اعلان یا تاخیر کے حوالے سے پہلے سے معلومات دی جائیں۔
زائر کے سامان کی چوری، اسے نقصان پہنچنے یا بالواسطہ کسی بھی قسم کا نقصان، اس میں سامان کی گمشدگی یا ایسا مالی نقصان جس کا انشورنس پالیسی میں باقاعدہ تذکرہ نہ ہو ایسی صورت میں بھی کلیم نہیں کیا جا سکے گا۔
ہڑتال کی وجہ سے پروازوں کی منسوخی یا انشورنس پالیسی پرعملدر آمد شروع ہونے کی تاریخ سے قبل کیے جانے والے اقدامات کے باعث پروازوں کی منسوخی بھی پیکج میں شامل نہیں۔
