ریاض : سعودی حکام نے عمرہ بحالی سے متعلق کہا ہے کہ عمرے کی بتدریج بحالی کا اعلان وبائی صورتحال کی روشنی میں الگ بیان میں کیا جائے گا۔
غیر ملکی خبر رساں ادارے کی رپورٹ کے مطابق سعودی وزارت داخلہ نے یکم جنوری 2021 سے سفری پابندیاں اٹھانے کا فیصلہ کرتے ہوئے کہا ہے کہ عمرہ ادائیگی کی بحالی سے متعلق علیحدہ سے اعلان کیا جائے گا۔
سعودی حکام کا کہنا ہے کہ عمرہ ادائیگی کھولنے کےلیے کرونا وائرس کی تازہ صورتحال کو مدنظر رکھنا پڑے گا۔
خیال رہے کہ آج صبح ہی سعودی حکام نے یکم جنوری 2021 سے ایئر پورٹس، بندرگاہیں اور سرحدی چوکیاں کھولنے کا اعلان کیا ہے۔
سعودی خبر رساں ایجنسی ایس پی اے کے مطابق وزارت داخلہ نے بیان میں کہا ہے کہ سعودی شہری بیرون مملکت آجا سکیں گے۔
واضح رہے کہ دنیا بھر میں پھیلی کرونا وائرس کی وبا نے حجاز مقدس میں بھی عوام کے داخلے پر پابندی عائد کروا دی تھی، جس کے باعث عوام کو عمرے کی ادائیگی کےلیے سعودی عرب جانے والے افراد کا داخلہ بھی روک دیا گیا تھا۔
