ریاض : سعودی شہری اور سعودی عرب میں مقیم غیر ملکی سات ماہ بعد مسجد الحرام میں نماز کی ادائیگی کا شرف حاصل کرسکیں گے۔
غیر ملکی خبر رساں ادارے کی رپورٹ کے مطابق دیگر ممالک کی طرح خلیجی ریاست سعودی عرب نے بھی کرونا وبا سے بچاو کےلیے ملک بھر میں لاک ڈاون کردیا تھا جس کے باعث مسلمانوں کو شرف زیارت بیت اللہ اور مسجد نبوی صلی اللہ علیہ وآلہ وسلم سے بھی محروم ہونا پڑا تھا تاہم اب دوبارہ مسلمان مسجد الحرام میں نماز ادا کرسکتے ہیں۔
میڈیا رپورٹس میں بتایا گیا ہے کہ نماز کی ادائیگی کیلئے موبائل ایپ کے ذریعے اجازت لینا ہوگی۔
میڈیا ذرائع کا کہنا ہے کہ آج سے عمرے کے دوسرے مرحلے کا آغاز ہوگیا ہے، ایک دن میں چھ ہزار کے بجائے پندرہ ہزار افراد عمرہ کرسکیں گے۔
سعودی وزارت عمرہ اور حج کا کہنا ہے کہ پہلا مرحلہ کامیاب رہا، کسی بھی عازمین میں وائرس کی تصدیق نہیں ہوئی، پہلے مرحلے میں پچہتر ہزار افراد نے عمرے کی سعادت حاصل کی۔
PICTURES: Rawdah Al Shareefah reopened after 7 months pic.twitter.com/0dciJ05jTQ
— Haramain Sharifain (@hsharifain) October 18, 2020
غیر ملکی میڈیا کی رپورٹ کے مطابق یکم نومبر سے دنیا بھر سے مسلمان عمرہ کی سعادت حاصل کرسکیں گے۔
سعودی وزارت حج و عمرہ کا مزید کہنا تھا کہ مسجد نبوی میں روضہ رسول اللہ صلی اللہ علیہ وآلہ وسلم پر حاضری کیلئے ریاض الجنہ بھی کھول دیا گیا۔