روس نے انوکھا اقدام کرتے ہوئے اسکول کے بچوں کو ہتھیار چلانے اور ہینڈ گرینیڈ کا استعمال سکھانے کا فیصلہ کیا ہے، جنگ کے دوران ابتدائی طبی امداد فراہم کرنے کا طریقہ بھی بتایا جائے گا۔
غیرملکی میڈیا رپورٹس کے مطابق روسی حکومت اسکول کے طالب علموں کو کلاشنکوف اور رائفلز چلانا سکھائے گی جب کہ انھیں جوڑنے اور صاف کرنے کا گر بھی سکھایا جائے گا، بچوں کو ہینڈ گرینیڈ کا استعمال کرنے کی واقفیت فراہم کی جائے گی۔
یوکرین سے جنگ میں برسرپیکار ملک میں اگلے ماہ سے نیا تعلیمی سال شروع ہونے والے ہے، جس میں بچوں کو جنگ کے دوران ابتدائی طبی امداد فراہم کرنے کا طریقہ بھی بتایا جائے گا۔
سیکنڈری اسکول کے 16 سال یا اس سے زیادہ عمر کے طلبا جو کہ آخری سال میں ہونگے انھیں فوجی ٹریننگ دی جائے گی جس کا مقصد انھیں زندگی کی حفاظت کے بنیادی اصولوں کے بارے میں آگاہ کرنا ہے۔
روس کے اسکولوں میں اس قبل 1980 کی دہائی میں بھی طلبا کو فوجی ٹریننگ دی گئی تھی، ماضی میں بچوں کو دہشت گرد حملوں میں محفوظ رہنے کا طریقہ، چرنوبل جوہری تباہی کے بعد تابکاری سے نمٹنے کے بنیادی طریقے سکھائے گئے تھے۔
روسی صدر ولادیمیر پیوٹن چاہتے ہیں کہ ڈرون کی ٹریننگ بھی اسکول کے نصاب میں شامل کی جائے، حکام نے ان کی خواہش کو مدنظر رکھتے ہوئے 16 سال یا اس سے بڑی عمر کے طلبا کو ڈرون چلانے اور انھیں جوڑنے کا طریقہ سکھانے کے لیے اقدامات شروع کردیے ہیں۔
