لاہور : بازاروں میں ملنے والے گوری رنگت کے انجکشن اور کریمیں کتنی نقصان دہ ہیں اس حوالے سے نگران وزیر صحت ڈاکٹر جمال ناصر نے عوام کو آگاہ کردیا۔
نجی نیوز چینل کو دیئے گئے ایک انٹرویو میں گفتگو کرتے ہوئے انہوں نے رنگ گورا کرنے والے انجکشن اور کریموں کو استعمال کرنا انتہائی خطرناک قرار دیا۔
ان کا کہنا تھا کہ کئی بیوٹی پالرز نے رنگ گورا کرنے کی اپنی کریمیں بنا رکھی ہیں جن کی کوئی سرٹیفیکیشن نہیں جبکہ کئی بیوٹی پارلرز رنگ گورا کرنے والے انجکشن لگا کر لاکھوں روپے بٹور رہے ہیں، ایسے انجکشن پاکستان میں رجسڑڈ نہیں اور نہ ہی ان کو امپورٹ کرنے کی اجازت ہے۔
ڈاکٹر جمال ناصر نے کہا کہ حکومت رنگ گورا کرنے والے غیر قانونی انجکشنز اور کریموں کے خلاف پالیسی بنائے گی اور ایسی کریمیں اورانجکشن استعمال کرنے والے پارلرز کو سیل کردیا جائے گا۔
انہوں نے کہا کہ لاہور کی مارکیٹوں میں لوکل سیرم، کریمیں اور انجکشنز باآسانی کم قیمتوں پر دستیاب ہیں جن سے جلد اور گردوں سمیت کئی اور بیماریاں لاحق ہوسکتی ہیں۔
