بالی ووڈ اداکار ارباز خان نے 56 سال کی عمر میں دوسری شادی کرلی ہے، ان کی دوسری شریک حیات کے بارے میں جاننے کے لیے مداح متجسس ہیں۔
بھارت کے سپراسٹار سلمان خان کے بھائی ارباز کی نئی بیوی کا نام شوریٰ خان ہیں، ان کے بارے میں عام لوگوں کے پاس زیادہ معلومات نہیں ہیں۔ شوریٰ خان اچانک ہی منظر عام پر آئی ہیں، دونوں میں پہلے تو محبت کی خبریں سامنے آئیں پھر شادی کی خبریں بھی آگئیں۔
ارباز خان اور شوریٰ خان کے نکاح کی تقریب نجی طور پر منعقد کی گئی، جس میں سلمان خان سمیت اہل خانہ اور دوست موجود تھے جبکہ ارباز خان کے بیٹے بھی اس تقریب میں موجود تھے۔
نکاح کی تقریب ارباز کی بہن ارپیتا کے گھر ممبئی میں منعقد ہوئی۔ شادی کی تصاویر خود اداکار ارباز نے پیر کی صبح انسٹاگرام پر شیئر کرتے ہوئے تمام لوگوں سے دعاؤں کی درخواست کی۔
شوریٰ نے بالی ووڈ میں اپنا کیریئر بطور میک اپ آرٹسٹ شروع کیا، اب تک وہ کئی معروف بالی وڈ اداکاروں اور شخصیات کے ساتھ کام کر چکی ہیں۔ بھارتی میڈیا کے مطابق ارباز اور شوریٰ فلم پٹنہ شکلا کے سیٹ پر ایک دوسرے سے ملے تھے۔
ارباز اور 41 سالہ شوریٰ کے درمیان تقریباً 9 ماہ تک ملاقاتیں رہیں اس دوران دونوں نے اپنی محبت کو مکمل طور پر مخفی رکھا۔
بعدازاں ارباز خان نے انھیں اپنی فیملی سے ملوایا اور پھر شادی کی خواہش کا اظہار کردیا، شوریٰ کے انتخاب پر ارباز کے اہلخانہ راضی ہوگئے جس کے بعد شادی کی تاریخ طے پائی۔
شروع میں ارباز اور فیملی کی خواہش تھی کہ شادی کو خبروں کو فی الحال میڈیا سے چھپایا جائے تاہم میڈیا کو اس کی بھنک پڑ گئی اس کے بعد روینہ ٹنڈن نے بھی ان کی شادی کی تصدیق کی۔
دلچسپ بات یہ ہے کہ شوریٰ کی بھی ارباز کے ساتھ یہ دوسری شادی ہےلیکن ان کے ماضی کے بارے میں تفصیلات سامنے نہیں آئیں۔
واضح رہے کہ ارباز خان کی پہلی شادی بالی وڈ رقاصہ ملائیکہ اروڑا کے ساتھ 1998 میں ہوئی تھی دونوں میں 19 سال کے بعد علیحدگی ہوئی تھی، ان کا ایک بیٹا ارہان خان ہے۔
